星期六, 7月 06, 2013

卡臣的潮式酒樓奇遇


(這篇是向卡臣致敬之作。)

卡臣係某間潮式酒樓的三廚,除左負責渣鑊炒幾碟粉麵小菜外,也是酒樓的點心師傅。

星期日下晝,某位電視台的肥監製同佢班老編黎食早餐,為新飲食遊戲節目度橋。肥監製對住張枯燥乏味o既點心紙,望黎望去都剔唔落手。於是喚來酒樓經理,表達自己o既不滿。

「阿陳,你間野黎黎去去都係呢D點心,都唔轉下o既?我就對呢渣野無興趣o勒!你叫你廚房整兩三款新野出黎!」

陳經理遇上名人刁客,於是就走入廚房搵搓緊奶黃包o既卡臣出氣。

「阿肥監製話你D點心唔得呀!又無黎新意呀!你而家即刻同我搞三兩款新野出黎,向監制賠罪!」

聽緊快活谷第三場,一手麵粉o既卡臣呆左。D點心通常黎黎去去都係呢幾廿款,自己水準亦十分穩定無咩問題,點解會無啦啦俾人踩?

廚房佬不成文規矩,阻人賭錢猶如殺人父母。卡臣雖然嬲嬲地,但肥監製交遊廣闊,如果得罪左佢隨時唔使撈,於是即刻捻計。

卡臣環顧廚房,第一眼掃到有兜包好等入雪櫃o既春卷,同整緊艇仔粥o既媚姐後面個腸粉蒸爐。

有救啦!卡臣即刻執左三條春卷落油炸,然後去搵媚姐幫佢蒸塊腸粉皮出黎。然後係廚部順便係兩碟o岩o岩炒好o既乾炒牛河同揚州炒飯上面,分別偷左D牛肉同蝦返去。

卡臣一路整點心一路爆粗鬧肥監製,仲係每碟點心材料入面放左幾督飛劍洩憤。無幾耐之後,三碟點心終於送到肥監製面前。肥監製食左之後覺得驚為天人,於是叫陳經理叫點心師傅出黎介紹下。

聽到第七場的卡臣, 知道肥監制話要搵自己,又唔知有乜投訴,阻住自己發達,於是捲起衫袖捻住出去打佢一鑊。

「師傅,唔錯唔錯!你班X樣,你睇下阿師傅做廚房o既,我講聲唔得咋,就即刻有三樣唔同o既野拎出黎,你地睇下人地幾X有創意!我平時講聲唔得,你地又交左D乜X野出黎呀?X你老X,你班X街再係咁X樣跟我,準備食屎啦!」

肥監制鬧完佢班老編之後,又即場係銀包度拎左兩千蚊出黎打賞卡臣。無端端發達o既卡臣,收左錢之後即刻收返埋個拳頭。

「師傅,你過黎講下呢幾樣係乜野黎o既!」

「詹生,呢個係乾炒牛肉包,呢個係奶黃鮮蝦餃,另外呢個係我家鄉點心,叫春卷炸兩。」

「好!春卷炸兩,外軟內脆!你班死X街,反傳統呀!創意呀!曉唔曉呀?」

「師傅,黎緊我有個新飲食節目,有班女要改名,你話改咩名夠吸引?」

「Errr.....我淨係識整點心,又無詹生你咁有文化,我邊識改名丫。」

「Excellent!D女全部名就改晒做點心!呢D先叫idea呀!你班人頭豬腦學下師傅啦!」

 * * * * * *

事隔幾個月後,飲食遊戲節目出街,卡臣成為嘉賓之一,仲因為以絕跡多年的驃叔式權威評論菜式,成為網絡紅人。

上年十二月,卡臣同肥監製合資開左間點心鋪,推出點心聖誕大餐。開幕之時,仲請到兩位點心女郎「春卷」同「炸兩」到場一齊剪綵。

關於兩位點心女郎的故事,詳看《春卷炸兩》

詩白爾說(卡臣腔): 世事如棋,每局都光怪陸離,有危亦有機。

5 則留言:

  1. 哈哈! 多謝你呀! 果然好嘢!
    我記得「春卷炸兩」個名你諗,來自「happy together」

    這故事是「春卷」同「炸兩」前傳,好有心思呀,字字傳神。

    回覆刪除
    回覆
    1. 本來以為無「春卷炸兩」呢樣野架,點知某日去飲茶,原來真係有。

      於是就順手度埋個故出黎。

      原本有個構思,捻住寫郭大導食完之後拍《春卷炸兩》o既心路歷程,搵埋苦瓜大人入錯屋一事成故,俾埋瓜瓜做男主角。

      刪除
    2. 搵日去試下春卷炸兩先

      郭大導個故事仲吸引喎!

      刪除
  2. 卡臣改行做厨师!
    哈哈!又一个犀利哥!文笔才思了得!赞!

    回覆刪除
    回覆
    1. 卡臣除左係廚師,仲係男模、飛機工程師、造型設計師、紮鐵工人同埋愛情蝙蝠俠。

      刪除