星期四, 3月 31, 2011

你會點揀?

而家份工雖然有趣有意義,但日子過得唔如意之餘,前景亦係不明。朋友都叫我轉工,但其他工作亦有需要擔憂同未明o既地方。轉與不轉間,男兒萬千難。

首先講講而家份工,內容隨意寫排名不分先後。

1. 視乎當日工作,需要不定時OT。
2. 工作充滿挑戰性,需要面對D自己完全不擅長或者未接觸過o既工作,工作即係On-job Training。
3. 上司o既要求同工作死線十分彈性,需應變能力高,而且準備隨時被急召。
4. 工作有時需要係無實權下做管理工作,但人事問題係死結,容易成為磨心。
5. 人工好一般。
6. 有分配自己工作o既權利。
7. 係上司的出氣袋,經常俾人照肺。
8. 食飯亦唔定時,開會時間長,經常被高層訓示。
9. 機構有華資機構特色,做事論資排輩要求跟循機構作風行事低調。
10. 做緊o既工作範圍係本地前所未見,處於開發階段,即係行頭窄。
11. 前景不明,不論升遷步伐還是行業如何發展都有疑問,但難保他朝會發達。
12. 工作關乎生與死,壓力沉重。工作到最後結果只有兩個,完成任務或者死得好慘(可能需要辭職)。
13. 需要同有毒物質共存。

又講下轉工可以轉去邊,呢個係第一份,又係內容隨意寫排名不分先後。

1. 工種同而家差唔多,但唔使走來走去日曬雨淋,但都係行頭窄。
2. 工作內容主要係填表打報告,無咁好玩。
3. 公司創立不久十分年輕,員工好多係後生仔女。
4. 人工比而家少一截。
5. 可靠消息指老闆很好人。
6. 公司不論工作時或者工餘,都會津貼你去參加各類培訓。
7. 唔使食素。
8. 前景一般,有可見將來唔使餓死先。

第二份係做安全佬,又係內容隨意寫排名不分先後。

1. 同而家一樣需要日曬雨淋。
2. 人工十分好。
3. 十大基建完晒前可賺幾年大錢。之後隨時玩完,需要計劃轉行。
4. 會講好多粗口,隨時學壞手勢叫埋雞。
5. 跟著個壞老細出左事可能要坐監。
6. 工作沉悶。

講左咁多,咁多位睇完我自述後o既職場老手,俾你係我你會點揀?

返工返左咁耐,都學識左一樣野叫沉默是金。平時囂囂張張講野無句真的我,面對一大堆獅子老虎都不其然收斂收斂。就算上司發我脾氣,我心裡都哼住哥哥果句「笑罵由人,灑脫地做人」,忍得就忍嘛。

4 則留言:

  1. 愚見係:兩份都唔掂,係揾到之前,咪走住.
    (試下可唔可以入到行頭入面既大公司,前景同人工點都好D)

    回覆刪除
  2. 我係職場老人。

    咁講,如果我仲後生,我會揀第一份;年紀大,就會揀第二份。

    至於有冇第三第四份... 就睇你緣分咯

    回覆刪除
  3. 終於都放工,回一回先!

    無兄:第一份果間已經係龍頭,而家人工已經加到同我而家一樣。

    C.M.兄:你認為我應該轉工?

    卡臣:今日先睇完《怪你過份美麗》個MV

    回覆刪除