星期六, 7月 04, 2009

我X你,永遠懷念塔可夫斯基

個CD盒右上角崩左o既?我X!
(好在買來聽o既o者!)

先旨聲明:筆者係一個唔識咩叫Indie咩叫Cantopop,二十出頭仍然沉迷九十年代華語音樂但又唔聽四大天王,最新聽o既歌叫《城裡的月光》。

佢地係近第二次令我願意俾真金白銀買唱片o既樂隊,原因有六:
  1. 暫時仲未有人非法上載,而我想聽《聖誕XX派對》,又唔想上「你管」度做馬,唯有乖乖搵碟買。
  2. 據聞全港得一千隻,又據聞佢地從始散Band,以為有得炒。(但明知銷情唔會好好,佢地隨碟無Poster無戲飛無Coupon。)
  3. 佢地玩D香港音樂人唔敢玩o既踩界題材,歌詞夠玩野,我鍾意。
  4. 以為成隻碟o既歌都好好聽。(先前已經聽左一半o既歌,點知其他o既歌D風格原來咁極端)
  5. 妄想以為聽/買呢隻碟係一種好型o既表現。
  6. 想學人買一隻碟就叉隻腳落黎扮香港獨立音樂o既見證人。
可以提醒下各位有興趣買碟o既朋友,FTC真係一隊極端口味o既組合。你鍾意就鍾意,唔鍾意就一定唔會三心兩意。你未必會鍾意何山o既noise guitar或者阿P發出近乎走音o既低頻訊號,更加未必明點解可以用一個「屌」字唱足成分鐘。但若果你唔介意放低道德底線或者鍾意講粗口鬧政府,又忍受到某D歌編曲同歌詞其實唔多夾o既問題。相信呢隻碟會引起你o既共鳴。

P.S. 「X」可以代入好多個唔同o既字,唔一定係粗口,例如「撐」。

2 則留言:

  1. 我老啦,對呢類band既興趣已經比十年前低好多.... 不過我都會有興趣聽聽.

    回覆刪除
  2. 信和果間鋪成個櫥窗都係,應該而家仲有得賣

    回覆刪除