星期五, 3月 20, 2009

小詩隨筆117

睇得唔打得

係唐司長未宣佈計畫造帛金......係鉑金級環保建築標準o既新政府總部之前,小詩去左全港環保示範政府單位度參觀。

你捻到有o既節能同環保設施,佢有。你捻唔到o既,佢都有。太陽光導管、太陽能板、回收廢水循環系統,風力發電機等等真係好齊。不過全部都好貴,而且效益真係好低,幾乎無可能係香城商廈使用,過到工程部都未必過到會計部。唯一小詩睇得上眼o既就係部氨水製冷機(Ammonia Chiller),因為有個丹麥佬話真係慳到錢。

不過講就慳到錢呢個環保示範政府單位真係笑大人口,自從係青蛙島搬左去對面海省電新總部,每度電費仲要平左一截之後,竟然到都仲交多左電費!(最頂癮係據講係用多左日光,室內熱左所以開多左冷氣!)唐司長,係香港由頭到尾都係講緊錢,鉑金級唔係唔好,不過你D鉑金級建築就要鉑金價,但鉑金價又一定唔會有鉑金級結果。與其到時俾人插到屎眼開花,不如將鉑金級政府總部搬過去將軍澳節省成本,塊熱辣辣o既地就賣俾D地產佬搞風搞雨仲實際!

----------------------------------------------------------------------------------------------

八十八樓危危下望

無錯,小詩就係某個星期三裡面其中一隻嘩鬼,一人一個奇奇怪怪o既問題煩到咁多位陽具地標員工真係唔好意思。

本來話係參觀設施,點知後半部分變左做觀光。簽完張「生死狀」,賣左半條命俾陽具地標之後,小詩就跟住一家大小上路。上到去八十八樓衝多上一層終於黎到天台o既平台,點知頭頂就黎一部CCTV,保安好到咁老實講句我有捻過同佢揮手。其實八十八樓上面o既天台真係無乜野睇,四周圍都有D巨型鳳爪同埋一堆射燈,條通道又窄到最多兩個人過到。不過果四隻角位o既景係幾開揚,望到山頂地標同獅子山。

帶隊o既果位小姐話天台平台上面只有一隻鑊(接收天線),本來仲以為可以好似Badman咁坐飛機跳落去,而家咁講連大家想係直升機度舒舒服服咁落黎都唔得!

上得黎梗係會捻下D衰野,例如打風落雨上黎係隻鑊隔離舉高隻手大叫「I'm the King of the world」,或者開創先河係八十八樓天台助跑再跨欄咁跳落去。

跳落去o既結局唔使問當然係變肉醬,但睇完鐵鎚哥篇大作之後,小詩反而有個疑問。唔知係八十八樓天台跳落去頭果0.98秒,會唔會見到任總偷偷地試用美源髮采,或者將D利賓納倒入支2003年o既Bordeaux度呢?

延伸觀看:別人的88樓

5 則留言:

  1. 香港政府的環保野 形式化, 政治show, 浪費納稅人的錢

    回覆刪除
  2. 最頂癮係據講係用多左日光,室內熱左所以開多左冷氣 <- E樣都問過環保專家iTinHK故版主,當時佢手頭上冇數字不過都話好多時搵笨!

    回覆刪除
  3. 老頭:假如你得閒到訓唔著不妨去機電工程署睇下你開大冷氣訓豬o既時候耗電量係幾咁驚人!

    開一部一匹冷氣機o既耗電足夠開十二個阿伯都唔用o既60W鎢絲燈泡!

    回覆刪除
  4. 希望唔好係機電工程署大樓既翻版就好了.
    可能到時有係審計署出手既時候。

    回覆刪除
  5. bittermelon兄,唔使審計署出手,班報紙佬都會炳到佢九彩。環保唔係唔好,但都要同現實妥協架,你部機出廿五點五度風,但到你個位成廿八度就o徒氣啦。

    座帛金總部真係咁掂的話,我捻老頭都會肯同任何Caltech女生做人世。

    回覆刪除