星期日, 3月 15, 2009

小詩隨筆116-新鮮滾熱辣

當Laughing哥成為偶像時

URL: http://www.facebook.com/group.php?gid=64826344432

雖然小詩無睇《學警追擊》,但都知道Laughing哥好響朵!
梁二上位啦~~


「放下屠刀,立地信耶穌!跟耶穌好呀~」

------------------------------------------------------------------------------------------------

我們都在不知不覺間行使暴力

《網友—新部落時代的來臨》

URL: http://blog.sina.com.cn/s/blog_4c3782760100buhp.html

玩forum都有一段日子,都有唔少熟絡o既網友,但圈子好似愈黎愈窄,新話題愈黎愈少,當然腦袋之間o既新衝擊就更加少。睇落又幾似中學,大家一開始玩埋一堆,後尾就會有小圈子,到最後小圈子之間自然會有衝突,甚至係圈子裡有欺凌語言暴力。不過網絡唔同中學,我地似乎無一個有效o既辦法去制止暴力,更加無辦法阻止激進思想傳播。雖然網絡實名制係個辦法,但因為實名制發言有變成文字獄o既可能,所以都係唔搞好過搞。

再者實名制令人唔敢講真話,變相咪又返番去現實上虛偽o既世界,咁唔算對人o既另一種傷害嗎?其實我地係網上面講野,究竟係令最少人傷心痛苦,定係希望尋找自己o既快樂同認同而不顧一切?

------------------------------------------------------------------------------------------------

又黎電車男港女話題

極之認同博客陳大文對近排港女港男話題o既講法,港女電車男呢兩樣野晨早已經講到厭。小詩極之相信市場機制會自動調節,港女數字會降低,當大家人老珠黃年華老去仍然孑然一身之時,自然就會降低要求。因為愛係你睇到對方有幾多優點同包容到對方幾多缺點啊!

睇完星期日檔案講港男果一段,小詩自問雖然唔睇動畫漫畫,唔打機唔玩PSP,好鍾意講野搭嗲,但因為單身又成日上網,所以都係被標籤做電車男。其實大家睇野咁膚淺,我又有乜所謂?「港女電車男」呢類標籤唔同工程師、律師咁要講條件資格,叫人一句「電車男」同叫人做「仆街」一樣真係非常隨便。一路以來人地叫我「仆街」我都認,而家連「電車男」我都認啦。

係面書上面唔少小詩o既男性同學仔都大叫「哦!原來我都係電車男。」。小詩都忍唔住笑左出黎,佢地班人平日思考行為都好正常,淨係鍾意打機o者,咁都係「電車男」?估唔到香港人到今時今日都仍然好努力咁尋找仆街,OK,今天全港年輕男士都仆街啦,好未?

唉~話說回頭作為一個電車男講拍拖真係好似幾遙遠,勇氣真係必需o既,但點適當運用同Gel個靚頭一樣,都需要時間改進歷練。各位香港女士,請多多包涵!講開又講,各位香港女士不妨拒絕班電車男之後,伸出援手打改造下佢地,救人一命勝造七級浮屠呀!

1 則留言:

  1. 講由人講囉。自己對港女敬而遠之,其實又對我無咩影響。

    回覆刪除