星期五, 2月 08, 2008

新年鬼咁煩

鼠鼠順利,由我掌握!
(Picture Source from: URL:http://geekologie.com/2007/04/mouse-mouse.jpg )

  1. 執屋執餐死:平時都唔多願郁,個人非常疲倦。已經做到趴係度仲要再勞動....
  2. 佈置:無神神要整到間屋懶有氣氛,實情有型無神......副對聯D閃粉又咁污漕,洗極都仲係隻手度!
  3. 辦年貨:除左孝敬班老人家o既禮品,仲有衫褲鞋襪......次次走一轉都成棵桃花咁返屋企
  4. 應付專家:每到新年,你會發覺有好多「忽然專家」......教你買股票,溝女,結婚,搵/轉工....講到咁叻點解仲日日打份牛工,唔見你開班授徒撈返筆?
  5. 口技窮:弓起發裁~弓起發裁~伸睇件骯~伸睇件骯~戴加錦話~戴加錦話~
  6. 賣笑:嘻嘻嘻....相對無雜言,唯有笑騎騎.....當然重點係唔想應D廢噙
  7. 食悶:年糕煎堆油角....全部都係甜o既!(仲有超熱氣!)除左蘿蔔糕芋頭糕....;髮菜蠔豉豬手燒肉切雞.....其實意義上都唔係俾人食.....
  8. 繁文縟節:初一唔可以洗頭,唔可以掃地...唔可以講D唔吉利o既說話(但係俾人鬧衰仔就無問題);初二拜呢個拜果個....(除左阿爺阿嫲之外全部我都唔識,所以小詩都係只向佢兩老真心表達敬意,其他果D...);初三赤口又唔可以去拜年....;見到人定鬼都要講恭祝說話,虛偽到第一句一定係四字詞語...係囉~唔係你捻果句X#$%囉!
以上o既千年宿怨並唔可以區區用利是錢擺平...
更何況呢個世界唔係我話事.....

過春節都係想一家人整整齊齊歡歡喜喜
計我話旅行避年同團拜最醒目....
橫豎都係要使錢....
點解唔過一次過搞得好地地
唔使煩過幾日開開心心o既日子?

P.S.完場前附送凸手搞笑新春賀辭短片
短短幾十秒都笑位連場!

必睇位:

凸手夫人係個酒樓廚房(可能係厲斌虎廚房但講都無人信)炸緊油角
凸手入去偷食油角食到成嘴都係仲要唔抹嘴!
凸手夫人就即刻面容抽搐咁兜心口輕輕力窩落去

URL: http://webcast2.info.gov.hk/2008/ce/celny08c.wvx

佢兩位不妨考慮下退休後去拍電影
咁劉以達都可以行埋一邊!

沒有留言:

發佈留言