星期五, 2月 29, 2008

小詩隨筆74


嘩...正呀....只係嫌佢三位唱得唔夠姣....
你話如果換做陳雅倫邱淑貞同黎姿
肯定睇到班麻甩想入非非

中暑

十幾度講乜鬼中暑?
係...小詩今天就係中暑......
捻住外面十幾度少少凍就裡面著少少衫
外面加件厚風褸
拉實條拉鍊
咁就趕頭趕命仆返去做Lab

跳出架火車之後
我照舊好有型咁係旺角o既街道上自由奔馳
用我o既速度刮起一陣風
嘲笑果班為保持形象慢條斯理o既潮童
假如我手上係把西瓜刀而唔係個手挽袋
我相信我會有古惑仔八成咁有型

為左趕上果班巴士
小詩逢燈過燈見人過人
唔知係咪今日空氣唔多靚
跑落有少少唔夠氣
終於架巴士就係o岩o岩趕唔到
企係個站擺返個黯然銷魂o既姿勢抖一抖
係呢個時候...終於出事o勒

小詩耳背發麻視野模糊失去聽覺
頭痛有如千百個手榴彈係個頭到爆開咁
今鋪大檸樂!
即刻襯自己未盲之前灌D水
又聾又盲,而且好驚會好樣衰咁暈倒街頭(到時實「柒」死)
好彩仍然感覺到D巴士係自己身邊經過
但就咁企左十分鐘,坐直升機都一定遲到......
終於俾個同學仔o既電話
招返我暫時無左o既果兩官返來
「喂?我聽唔到你講野...」「係....哦...唔...好...」
真係該煨~個頭痛到五顏六色仲要夾硬聽電話
(不過又多謝佢,如果唔係小詩又企多十分鐘都似)
如果果時對方同我講叫我俾晒副身家佢
睇怕我就係大檸樂中o既大檸樂

收左線,頭痛若裂,好眼訓...
赫然發覺自己一身熱汗.....
好左有汗出,出唔到就死得....
因為呢個小小意外
小詩個頭由朝早"Wing"到夜晚....

噢...原因係咩?
你自已慢慢搵啦...
原因就係因為「柒」左囉!

-----------------------------------------------------------------------------------------

一塌糊塗

十下十下咁返到Lab
原來成村人都未到
但個lab就要開始o勒
小詩試圖測試下自己副偈行唔行得
事實上都好勉強
demtor話要開波咪開囉....

lab就pre左一半
其他真係十下十下
結果就真係炒晒成個lab
都唔知做乜春!

最嬲但最好笑o既打D水入隻隻蝦度
demtor講得唔清唔楚(其實同份manual有出入)
小詩就打左足足十倍份量o既水入去
蝦兄佢真係無陰功
一路打一路噴返D水出來
佢就一路係咁郁....
今云罪孽深重....
小詩食長齋都唔掂........
做完個lab小詩係咁X自己究竟自己搞乜....
D data真係垃圾....

收到風要交份Lab report
又死死地氣咁做埋份野先食飯
心情已經勁唔靚
個頭依然係Wing Wing地
做做下又有D人「飄過」....
(仲要見到果個成日「what the....」電腦梁係度借書...)
結果四點鐘先開到飯.....
原本去睇exhibition o既計劃又被逼postpone...

二零零八年二月廿九日......
係小詩生命裡面當黑o既其中一日......
到死果日我都應該會記得o既

P.S.如果佢係度,實會有人關心下小詩....
奈何命裡有時終需有....
忙到發癲應渣攤......

沒有留言:

發佈留言