星期五, 1月 04, 2008

騙財高清悲中來


講到質素,暫時CRT都係好D!

經過兩間電視台大力吹捧,家陣連踩住架單車送石油氣俾你果位阿叔都知道有高清電視。無鬼影,無雪花,影像更加細緻,嚇到D女藝員依瓜鬼叫,驚死個殘樣出左街會影響市容,即刻去買番一打半打高清粉底保障市民生命安全。

一邊上鏡o既人驚到鼻哥窿都無肉o既時候,另一邊香港人又發揮「執輸行頭慘過敗家」o既精神。個個仆住去買部高清電視同機頂盒,好似無左呢兩樣野以後實會無電視睇咁。

小詩o既老爸老媽都成日問小詩,過左12月31號係咪屋企部電視睇唔到野?高清電視係咪真係咁正?自己阿爸阿媽唔識,實在嬲佢地唔落,唯有耐心咁解釋下究竟搞乜春。

查實高清電視係咪真係咁清?以往高清電視所放出來o既pixel大慨係720X576(4:3 o既比例),家陣轉到去高清制式(HD, High Definition)變左做1920X1080(16:9 o既比例)。照道理個camera影落去係比以往放大一倍或者叫細緻一倍....係一倍咋喎!(嘩!仲唔夠呀?)一倍梗係唔夠,你自己試下搵部相機用最wide(1X)個位幫自己影幅車頭相然後將focus加大一倍(2X)再影多相,比較下細緻度會唔會有咩大分別?答案梗係睇唔出啦,最多閣下副尊容無左邊o既o者.......

假如講到畫質,就好應該以部機畫面每粒pixel o既大小做標準。理論上pixel越細粒畫質愈好。一部正常o既42吋高清電視來計佢o既距離點數比同一部21吋o既傳統CRT電視其實差唔多。所以畫質亦相差無幾。以前D人唔識野以為買部29、32甚至40吋o既電視就好好享受好把炮,點知起晒線,格同狗牙,就好似上年你係見茶餐廳果部用唔盡D pixel o既42吋LCD HDTV一樣。當然而家部LCD HDTV駁左高清解碼器就清好多啦。

對於鍾情影音o既發燒友,畫質要細緻之外色澤亦好緊要。CRT可以做到32bit(2 o既32次方咁多隻色;人眼睇到24bit)而HDTV據講暫時只係去到16bit。D色靚咁多,所以黃貫中都係CRT電視消失之前買番部自用。小詩唔係玩家對眼分唔到咩顏色層次,當然唔會跟住去買啦。

插左咁耐,其實高清電視都有好處o既....16:9制式叫統一左現時五花八門o既顯示比例,方便大家睇DVD(720X576,又係16:9)可以用晒個畫面,電視劇影個close up出來效果有壓迫感D。而數碼廣播無失真,將俄羅斯雪花同飛機下的鬼影一一掃走,政府推行數碼廣播算係福為民開啦~

說時遲那時快,有團體斷估話有五十萬部CRT電視好地地會被人拋棄。查實家除左睇外國劇集一定要用高清之外,幾間土炮電視台o既膠劇(同事X分親)同垃圾劇(九唔搭八ATV)又點襯得起部HDTV?D土炮劇佈景差,劇情差,萬一睇到火遮眼無晒理性掟爛部過萬蚊o既HDTV,咁就該煨囉!都係等到2011果時內置埋解碼器o既HDTV減價促銷,或者等你屋企部CRT返魂乏術先買至化算,掟爛幾部都無咁肉痛嘛!

沒有留言:

發佈留言