星期三, 12月 31, 2008

再度回味9-旺旺廣告的另類欣賞

近年旺旺為拓展國內市場,推出不同廣告推銷各類產品。廣告每每都令人印象深刻,不是內容對白令人難以接受,便是製作質素差勁。小詩知道電影裡低成本的片種叫B級片,不知旺旺的廣告可不可稱之為「B級廣告」?


拜年要旺連拜山也要旺,那送禮要旺遲早連送殯也要旺?


完全將小朋友童真抹殺的一段對白,看見兩堆小肉團在調情,小詩就想吐了。


究竟是吃過會噴火很過癮,還是味道不錯吃過真過癮,其實小詩還沒有搞清。但有一點可以證實的是,廣告中全家上下腦袋都是有問題的。


假如片中的小孩每天都跑到村裡的士多,去買片中被檢出有melamine的旺仔牛奶,小詩肯定他一定不會跑得這麼慢和身形這麼胖。首先喝這種奶不長肉,再者每天都這跑都跑得這般慢,心臟也肯定有問題了。


旁白惹人失笑還算了,還找來了小孩扮貓王皮禮士和小粉絲,以表達吃這種橡皮糖「很帥」。最後還提到幾多歲的人吃這種糖都很「QQQ」,但請問「Q」是甚麼意思?Cute還是Kill?假如是後者還算了,若是前者的話連Cute,Cool和Handsome三者都分不開,那製作參差教壞小孩的罪名就脫不掉了。


最後一個也最多人談論的「B級廣告」,一對姊弟在討論「O泡果奶」四字中O字的讀音是指數字還是字母,而最後結論是字母,意思是指喝過這種有氣乳酸後會噯氣。廣告商玩的噱頭是Ambiguity(歧義),但來到香港"O"的歧義已不只得一重,而是雙重的意思(也可說是兩重的腦殘)。這個情節生硬得令人「O咀」的低質廣告,就似是嘲笑著旺旺的飲料質量差勁,無論你選擇喝還是不喝,也會讓你目瞪口呆。

小詩隨筆112

終於完成考試,擱筆日子結束,慶幸每天便便情況正常,因為小詩知道「每天有便便,小詩不會病(感冒)。」。無獨有偶每年來到這些考試時節,爆炸性新聞總是浪接浪,正當在筆記簿裡抄寫會吃人的考試重點,聽到荒誕離奇的新聞總令小詩恨得咬牙切齒,因為總來不及聊以自慰冷嘲熱諷一番。

一眾朋友和博客努力寫2008大事回顧,小詩只好趕乘尾班車向是月新聞和見聞「抽水」。

公孫止

假如大家有看博客《絕情谷》,肯定清楚小詩在說倪某。是月箇中複雜荒誕的情節,實在比電視劇更過癮。試問無記的編審有沒有勇氣讓這種違反「善惡到頭終有報」,從頭到尾厚顏無恥的角色放上大氣電波放映?同一文字風格的兩封分手信,向「XX明」劉錫明道歉,信基教上帝,全部都是假的,目的完全是為儘快洗脫下流的形象。

「一次不忠百次不用」,小詩早在四年前已全面封殺這位「人格破產」的偽君子,不論書映視播還是專欄。但對於不老玉女的決定,小詩非常尊重亦非常理解。人到中年驀然回首總希望生活安定下來,要撇下一位共對十多年能夠為自己提供生活空間的伴侶,實在是難以動手,而倪某亦看透玉女的心思。

今次事件中受害的張小姐對於任何香港傳媒來說只是餐前小點,主菜還是倪某自編自演的好戲。小詩對倪某出神入化的手法實在佩服,不過還是有三點質疑。

  1. 倪某的分手聲明中倪某提到他劈腿是因為有「構性中年危機」,小詩百思不得其解,翻查「圍雞」的解釋是「人到中年懷疑自信,為求證明自我,行為奇異。」。小詩不明白「識食」的倪某一直以來一面手握玉女,另一面嘗盡「各地佳餚」,何來有「泡妞類結構性中年危機」?由此可見,「結構性」三字具有符合黃子華式的解釋,即「身體結構上」。換句話說,即倪某的陽具出現了問題,再直接點說就是陽痿了。

  2. 極可能由倪某代筆的玉女聲明中,有一句「我的伴侶絕對犯得起這個錯誤」,假如玉女不認為倪某犯錯就不用說倪某「犯得起這個錯誤」,直截了當無謂惹人懷疑,「多角關係沒有問題」,反而更適合用於該文。雖然玉女認為倪某沒有犯錯,但及後倪某犯了一個很嚴重的錯誤,那就是結婚了。衛斯理的好友蔡瀾先生說過結婚(尤以一夫一妻制)是一種很野蠻的制度,意思大慨是指你婚後只能和你的合法伴侶談情說愛。倪某決定結婚無疑就是毀掉他世叔伯的「哲學」和他本人的「成就」,更加破壞了玉女一直以來渴望維持現狀的心態。

  3. 倪某對大眾反對他跟玉女結婚一事反應甚大,甚至以「辦喜事也圍剿,真血海深仇呀!」。事實上大眾關心玉女比對倪某的下場更多,傳媒圍剿的只是倪某一人,帶血海深仇的人反而是劉錫明。就算是輿論圍剿倪某,甚至是大眾看倪某「仆街」也是理所當然的事。因為當年倪某一手種出無中生有無限上綱式的報導,鼓吹圍剿劉錫明,到現在青出於藍被某幾本周刊報章黑名單天天死咬不放,跌落傳媒可畏無間地獄永火深淵,倪某也該老懷安慰已!
在事後周刊專訪中,看得出倪某因輿論壓力下向劉錫明道歉,然而當年倪某攻擊過何只劉錫明一人?倪某誣衊筆伐過的人包括「咖哩王子」,「漢堡包嘴」等等,若然有心向受害人認錯,早就該負荊請罪向當事人跪地斟茶認錯了。江山易改本性難移,若然大家認為倪某婚後必定循規蹈矩,不妨前往不烈顛帝國一遊,順便到當地博彩公司開個賭局,相信博彩公司提供的賠率一定異常吸引!

P.S.執人口水尾!博客《小瓶子》發揮創意,將倪某精采的分手公開信推薦給本地高官作為辭職公開信的參考範例,改篇後意境更上一層樓,令人拍案叫絕。
URL: http://ustbettylam.blogspot.com/2008/12/blog-post_8102.html

-------------------------------------------------------------------------------------------------

阿扁又下囚啦!

「我要跟團團圓圓團圓了!」
(Picture Source URL: http://tw.people.com.cn/mediafile/200811/11/F200811111647492023714616.jpg )

小詩一早算過寶島法官放阿扁出監純粹是想戲弄阿扁,為了阿扁不讓玩命又可以讓他享受「通櫃」的樂趣。再者作為一個地方前元首,被禁出境實在會悶壞他,不如也就給他一年多去幾回「監獄旅行」,合共的花費和待遇相信也和退休元首差不多。相信現在「愛寶島」的阿扁待在寶島的監牢裡等候審訊甚至渡過餘生,也不應該再有異議了!

-------------------------------------------------------------------------------------------------

勇敢的伊拉克記者



評語:擲的勁擲得準繩,避的妙避得及時。

薯仔被人擲鞋攻擊後還可談笑風生:「All I can report is it is a size 10」。可憐那位記者身在被帝國輸入了自由和民主的伊拉克,在擲鞋表達意見後仍然被保安部門抓了去毒打,身體腫得變成size 10。

-------------------------------------------------------------------------------------------------
(道德重整派人士到此為止,請即迴避!)
-------------------------------------------------------------------------------------------------

聖誕XX派對

URL: http://www.vimeo.com/2566554

原本這是個不錯的主意,MV也拍得非常精采過癮,充滿著自由清新,還有少許青春的含蓄。及後該團體的聖誕私人活動經過傳媒歪曲報導後又變成另一回事,警方要求取消動,大賣風月版的道德塔利班報刊集團又再一次獲得銷量勝利,藝術則成了犧牲環節。MV裡沒有意態撩人的動作,活動也沒有鼓吹過性愛性濫交,觀看MV後也無法引起正常人的性衝動。假如你因為看過MV而有自慰或者召妓的衝動,不妨繼續或者去看精神科醫生,但相信後者幫助比較大。

星期二, 12月 09, 2008

聖誕歌報佳音

(本文含有暴力成分,各看官請自行決定是否迴避)

幹探兄對Nat King Cole唱的聖誕歌讚口不絕,並奉為睡前佳品。小詩對此不以為然,皆因慶祝聖誕節這玩意是信奉耶教的洋人首創,洋人把聖誕歌唱得出色絕不出奇。說起聖誕歌,小時已暗地裡「鬼五馬六」的小詩,除了會唱「平安夜...見到你阿爺...」這首「經典」之外,還從ABC老表學會半首《普世歡騰》洋學生加料版。

心血來潮在圍雞找到全曲歌詞,歌詞暴戾但非常抵死啜核,完全表現出學生對師長極其討厭的不滿情緒。可惜沒法在你管找到相關MTV,只能找到《普世歡騰》原裝作伴唱用途,若然能找到加料版MTV跟著一起唱定必生趣盎然。



Joy To The World

lyrics

Joy to the world, the teacher's dead
We barbecued the head
Don't worry about the body
We flushed it down the potty
And round and round it goes
And round and round it goes
And rou-ound and rou-ou-ound and round it goes

URL: http://en.wikipedia.org/wiki/Joy_to_the_World,_Our_Teacher%27s_Dead

若各位對洋文加料歌仍然意猶未盡,小詩誠意推介《The Battle Hymn of the Republic》的學生加料版本《The Burning of the School》,一句"I hid behind her door with a loaded .44. And the teacher don't teach no more!"同樣暴戾而精采!話分兩頭,在找本文參考資料時小詩有一個小小的發現。香港的加料歌詞大部分都淫穢下流;帝國的加料歌詞則祟尚暴力,這也能隱約解釋為何帝國的校園槍擊案這麼多,而香港學生「敢愛敢做」的本領那麼高。

星期六, 12月 06, 2008

小詩隨筆111

一切已飄到白雲外

小詩家裡的窗倒真好,只要往窗外看就能夠看見不錯的景色。這天隨著冷風中的晨光起來,腦袋麻麻還沒有醒過來。回頭望著窗外山頭曬得金黃,舉頭盡是藍天白雲,路旁的棵棵樹木聳立不動,這幅像是靜止中的美景卻牽起萬千思緒。

這種情況經常會令小詩回望過去種種,不禁耳邊又響起薰妮的《每當變幻時》。



其實想來幹甚麼?還是看書去吧!

-------------------------------------------------------------------------------------------------

食評雜談

一件美食其實哪可以用多少粒星星去數量化?

最近輪胎怪獸公司出版香城版食店評級,來自法蘭西的橡皮怪獸,評分方法師承法蘭西大餐評級準則,挑剔度簡直高到不得了。食物色香味俱全固然少不了,服務整潔也當然是必要部分,但連裝潢排場私隱度也評分一番,也許真的過了火位。月前文化梁講到一位對食物專注到極點的禪師,在完寂前一刻仍能夠專注地享受甜食。這種對食物先尊重後享受的覺悟境界,相信輪胎怪獸公司一定有所忽略。只要進入閣下嘴裡的美食不變,不論坐在街頭巷尾的摺凳還是高級食府的舒適沙發,專心地享用同樣美食定必令你感到愉快。

對於受到輪胎怪獸食評威脅的香港食評人,大都說對方不懂得「地道美食」一笑置之。雖然輪胎怪獸不懂東方飲食文化,但香城內「阿豬阿狗」級的食評人荼毒人間的案例隨處可見。最近紅起的廚藝演員主耶穌評擊以「魚有魚味,雞有雞味」聞名的May姐,以及「有口感」作為評價之一的肥媽評價美食手法差勁。香城食評演員事實上經常濫用空泛的味覺詞彙,例如「有層次」、「有口感」等等。小詩看後百思不得其解,「有層次」、「有口感」就如「意境」一詞難以準確描述事物本身。此類耐人尋味的評價實在令人感到煩厭,更曝露出食評演員背後欠缺內涵「冇腦」的洋相。

一個真正食評家,至少有研究的食物文化的渴望,與進食者之間的交流,最重要還是要有個人的見解。




-------------------------------------------------------------------------------------------------
今年收筆

星期四, 12月 04, 2008

純粹創作-相遇

甫踏進機艙,次光速座駕上的機門徐徐關上,轉眼間我將回到我的工作崗位。

剛離開的瞬間,我又再看到你的影子。其實每日同樣的時間、同樣的地方,我都在重複著這樣的遭遇。

這刻我在想,假如我的座駕能夠多留百分之一秒,或者你會送我一個微笑。

假如我的座駕能夠多留一秒,你可會送我一個擁抱?

案頭上十指在揮動,我正告訴全世界我有多忙碌,也後侮著再多花時間於眼前的大事。相信現在的你也擁有同樣感覺,因為我們的世界實在太快了。

星期日, 11月 23, 2008

小詩隨筆110

算命先生騙你十年八載,神仙乩童嘴有語無倫次

URL: http://www.nownews.com/2008/11/10/10854-2363407.htm

「關關難過關關過」

比M字額還厲害的著名吹水師小詩提供八字九流橫批: 求生不得,求死不能!

---------------------------------------------------------------------------------------------------

我還沒有"Grad"

這個畢業禮對於小詩來說意義不大,副學位的名銜很快就會被淡忘,而且那個地方也不曾是我所留戀過。我心裡記住的只是與小詩一起讀玩想談的同學,當然還有打從心底裡尊敬的博士。

很抱歉畢業禮一完結就跑去找老爸老媽,丟下了一大堆朋友。拍照一輪恭送兩老離開後才找回Zero,Tina和芯芯三位好同學。接過她們的Giroro頭枕和花,小詩有點不知所措,因為想不到這兩個玩意原來是送給小詩。小詩感到不好意思的是還沒有跟她們拍幾張照,她們又要回到國子監上課了。

昨天跟波子和Ivan跑到薄扶林拍照,拍下好幾張好玩的照片。可惜我希望在相片中出現的好幾位朋友卻沒有現身,想來前幾次每每都事與願違,難道當個朋友的距離也那麼遠嗎?雖然還未來到大學畢業的時候,但不知下回再跟你們一起穿上畢業袍是個怎麼樣的日子了。

星期五, 11月 14, 2008

小詩隨筆109

語癌.語塞

唔係上堂做改寫句子,都唔發覺自己寫出來D野咁多語病。小詩D文法無晒白字又多亂咁寫野,好彩一向無乜人幫襯,萬一quote左黎做金句你話點算?

最近小詩做左個書蟲學生,除左睇各大名家o既扑之外,仲加碼係國子監o既藏書閣努力借書來刨。一心捻住好似文化梁咁刨書當樂趣o既小詩,變左個壞鬼書生,睇得書多個腦仲生埋鏽。家陣連講句野都口窒窒,個腦控制唔到自己把口你話點算?

-------------------------------------------------------------------------------------------------

大學生的上中下等

好不幸小詩係課堂遇到一個係薄扶林出黎o既假日本博士,係佢身上聞到一陣薄扶林o既陳年傲氣同酸味。假日本博士係薄扶林o既祖國教授加恆河教授o既混合體,D洋文發音搞到你頭痛尤自可,最惡頂都是一副自以為是o既態度。假日本博士同小詩係中學時候o既一位老師非常相似,就係「好為人師懶係正義」,下下都插手大講耶穌,講下自己威水史等等。

幾日前假日本博士佢老人家,因為同學係導修課一句可唔可以用中文講解下就大發雷霆,一面講自己幾咁開明,話各位同學仔有咩問題佢老人家會盡力幫大家。又話大家溫書備課差勁只係一D二流學生,又唔睇參考書云云。又介紹幾本功能型讀物,大家可以借黎提升能力。雖然佢鬧得都幾o岩,但某程度上小詩都幾唔滿意佢。

小詩就覺得做得天子門生就應該識自己尋找同解決問題,大部分野係唔使人再教o既。雖然社會對我地呢班人期望好高(其實係過高),但人才係磨出黎o既,係龍o既自己識飛上天,係蟲o既自己會鑽地,學若老頭話齋:「自殺唔係犯法」,咁大個人要X街的話自然就會X街,完全唔需要亦無理由要擔心。

話時話假日本博士今次出黎認威威,出來效果不佳之餘仲好樣衰。事實上班學生係咩等級張成績表同外面D老細會評價,使乜你老人家係度說三道四?調番轉頭睇你有本事都飛左去外國做研究,仲係度教班二流學生,大晒自己果D陳年舊事,然後俾一大班學生係後面講是講非?

呢個N流博士提醒左小詩,做人真係要謙厚D。認親叻又或者叻唔切o既人,下場通常都係會好鬼樣衰。

-------------------------------------------------------------------------------------------------

Graduation Barcode

話說天子門生行畢業禮o既時候,多數會俾D地位高o既人物例如身為校監o既凸手、校長或院長其中之一係頭上扑一棍。每年係國子監一個學院畢業o既學生都成幾百人,受扑o既只係捱一棍,扑人果位就要扑幾百下,捻起都覺得辛苦。

前幾日小詩夾埋燒肉阿冤一齊同蘇蘇食生日飯,講起呢個畢業季節就不其然講起呢單野。要預防扑到手軟,其實整個機械支架等凸手等人套隻手落去,象徵式握住碌棍由機械代勞一定慳水慳力。但其實咁樣都幾似屠房蓋豬仔印咁,如果加埋條輸送帶你話似唔似超級市場收銀處過機咁樣?

捻捻下不如係頂四方帽整個barcode,俾校監係頭上"咇"一下,好似D工廠QC咁樣。哈!查實你畢到業,咩Hon畢業都係一種QC o者,係咪?

-------------------------------------------------------------------------------------------------

RickRoll

網上總係有D無風起浪o既奇怪惡搞整蠱熱潮,香港有牛河博士、十啟泰等等人物,外國就有Rick Astley。一首80年代大熱作品《Never Gonna Give You Up》放係youtube o既MV,被人link左黎整蠱人,令到潛左水十幾年o既Rick能夠從另類途徑大紅大紫。


網上有人無聊到教人點樣整蠱人


《Extreme Roll》,玩到無野好玩就開始將條MV玩特效!


《BarackRoll》,以上呢條片一種多重惡搞o既例子
有份創作o既人不但將奧班馬o既speech Key落首歌
仲玩野將《BarackRoll》條原片Key落老麥o既競選集會屏幕度!

想睇番條原片(非RickRoll)可以按此或者去圍雞比較下香城人定美國佬厲害D。

星期五, 11月 07, 2008

小詩隨筆108

我們曾經犯過的錯

URL: http://aulina.mysinablog.com/index.php?op=ViewArticle&articleId=1413318

有時候看見侍應的眼神,也覺得有點不好意思。

-------------------------------------------------------------------------------------------------

見世面,開眼界

近來國子監那邊安排的活動多多,想來都是希望用現實催逼著小詩這些笨頭笨腦的傢伙成長。

看見右手邊那個高得恐怖的山坡,便可知小詩其實已經爬到很高很高的地方。這條號稱頗為難行的郊遊徑,雖然路途中不斷上山下山跨石走澗,但小詩跟兩位同窗花上不到兩個半小時便走完了。

根據老師所言,設計郊野公園路徑和設施的首要條件,都是為了提供大眾遊樂地點。說的不錯,走來一段路燒烤爐營地俱備,但可否在這個山徑旁邊加設一條滑梯,讓走得雙腿痠軟的遊人在放鬆與刺激中一面享受風景,一面直抵終點?

十月下旬有一個由貿發局(HKTDC)主辦的環保展覽,就是讓一眾從事環保事業的公司機構政府部門聚首一堂,簡介一下行業發展,順便介紹產品拓展客源。小詩與一眾同窗跟著一位長跑博士來到這兒見見世面,順便混水摸魚和業內人士交流一下。







參觀其間有來自英國的綠化磚石模件參展商,小詩與代理小姐交談一番,知道原來林村河上游(右圖)有鋪上這種可供植草的磚塊,據說防止水土流失的功效不錯。不過在香港這塊寸金尺土,連小溪也得截斷取地的地方,似乎找不到商業性質的買家。

觀乎整個展覽,產品都不外乎藉省水省電為買家節省金錢,創造龐大利潤的方法反而少之又少。相反在澳洲昆士蘭省的商貿機構卻引出計劃中簡單的水流發電,無需建造水壩下利用「鴨記」LED電筒的發電模式,在海岸線山川河流等等發揮作用。假如本地機場、發電廠能夠照辦煮碗,相信比風力發電的效益更高。

場內的本地產品都高呼社會良心,自稱使用它們製造的產品絕對可以「財德兼備」。但眼前的一部部空氣淨化機、環保熱水器,其實都不如另一邊的再造紙模具,甚至一個算死草到不得了,由一個國產油沾米包裝袋改裝而成的環保袋。因為它們本身都是一些不設實際的浪費,無法解決這物慾放縱社會中最重要的問題。

今天是一個學術會議的最後一天,小詩有幸在星期一觀摩一個「世界性」會議是個甚麼模樣。

半生從事環境研究的科學家從來都不是富有的一群,簡單如POLO Tee配上牛仔褲也可登上大雅之堂。也許香港以前是個英語社會,讓大會能請來的都只是會說英語的科學家,所以如果閣下想看看荷蘭科學家的學術專長,看怕要失望而回。
博士曾經說過,科學家開學術會議其實都是「渣流灘」,旅遊玩樂的目的比跟行家交流來得重要。(最多只是握手打招呼,合作研究大可回家再辦)若要了解最新學術知識,還得拜讀一本本文字密麻麻的期刊論文。聽過幾位洋人博士中學授課式「點到即止」的報告後,舉手發問的只得聊聊數人,這讓小詩了解為何博士說他當日可以跟其他研究生撇下「師傅」,登車整日遊樂去。

在小組會議中,小詩跟同窗一起聽完五個來自各地研究人員的「二十分鐘報告」,雖然各地口音和一大堆專業名詞搞得小詩頭昏腦脹,但小詩仍從他們身上發現兩個有趣的現象。

1.)美國的社區學院也會搞學術研究。跟香港的不一樣,除了賣副學位專業證書,還可以向機構政府申請撥款研究。(這下子可讓香港的博士生們咬牙切齒!)

2.)這個研究海藻的會議上竟然驚見來自印度某原子研究中心的研究員,一所龐大的研究中心名不副實還「不務正業」,可見印度的國家研究機構制度相當混亂,某程度上研究撥款亦相當傾斜。(印度研究員發表的論文鏈結-按此)

雖然沒有學到甚麼先進學問,但這個月總算像個天子門生開過眼界。

(Hong Kong Disneyland Hotel, Picture Source From URL: http://upload.wikimedia.org/wikipedia/commons/a/a5/Hong_Kong_Disneyland_Hotel_002.jpg )

-------------------------------------------------------------------------------------------------

小啟

隨著讀者群的成熟,小詩亦長大了,看來再也不需要將文字堆砌成一行行,方便那些被文字堆嚇壞的傢伙。回到一段段文字的風格,小詩此刻不敢怠慢,還望讀者能體會小詩的心思和成長吧!

星期四, 11月 06, 2008

純粹創作-車廂


每天上班時候都在鐵路裡和一大群人一起左搖右擺,跟那些夜店的派對不同,每個人也是板著臉一副中秋處決前趕赴刑場的頹相。就算是打個呵欠,聲音也像豬叫一樣。其實這個車廂也頗像運豬的車卡,擠擁得連轉身的位置也沒有,還有一陣陣濃烈的氣味在空氣中散播。

站在不遠處的老色鬼都帶著羨慕的眼光來看著我,因為今天我成為了五位塗上廉價香水的年輕OL之間的孤島。人家說年輕女子多是「十八扮三十」,譬如說在我面前的這一位,厚厚的妝容下手挽著過時的LV皮袋,大意得忘記拉上拉鏈,從那袋口的狹縫中仍可藉折射的光線看到那塊化妝鏡的存在。虛構老成的外表透視出年輕的無知,假如我站立的地方換上了一眾老色鬼,這個四周都沒有扶手的位置,「下手」的機會可多的是了。

假若要滿足食色慾望,我寧願北上陪大陸老闆遊樂,甚至用真金白銀去買廉價的歡愉。至少這樣我還能保持我的雄性尊嚴,換取年輕女生消除我身上「血氣方剛」的原罪,轉而關注那些經常不被留意的好色中年。列車終於從尖沙咀開到金鐘,奇怪的是每次車長到站減速之前必先來個重新加速,這一下突如其來的慣性現象曾讓我害怕失儀,假如因此我撞上了一位女士然後她大叫非禮,那我辛苦經營回來的紳仕形象便迅即煙滅。為此我每星期在健身室苦練下肢肌肉,務求做到在任何情況下都可以車廂內的扶手一樣紋風不動。

「哎呀!」,一個LV皮袋撞上我的腹肌,另外有一隻玉手抓住我的胳膊,原來對面的年輕OL已經倒在我身上。OL一面尷尬的離開車廂,望著她纖幼的雙腿,我恍忽明白女強人上司的粗腿是怎樣練回來的。

星期五, 10月 31, 2008

今期播放27-有辣有唔辣


假如陳百強如別人所說是都市人的心靈倒影
那盧廣仲可能就是我的陳百強
沒有MLA的灰色,只有晨光淺藍的單純
還有無邊無際的思想空間


近來電視電台不斷宣傳一隊經Richard認可的老翻Carpenters
老實說Karpenters的女主音聲線和技巧都比Karen還差一截
與其懷緬過去望梅止渴
不如往前看直接聽盧廣仲,同樣感到舒適暢快。


一直以來都對LMF都有所誤會,以為他們只是一群反社會份子
因為他們的歌大都批評藥石無靈的社會
但近來聽了《飛》令我覺得我看錯了他們
說穿了我們批評這個社會無非都是想逃避屬於自己的罪責
在寄望社會重回健康之前,我們是否應該首先面對自己的缺點呢?
至少這個世界沒有天掉下來的完人,也沒有人一出世便注定要做天王巨星

大香港.看江山如此多嬌-省會半日混(2008年10月完整修改版)

身在祖國南方經濟大省省會的九個小時內,果真令別了祖國大地幾載的小詩大開眼界,一面驚歎國家的硬實力不斷膨漲,另一方面卻感慨軟實力一如多年停滯不前。

城際鐵路與地鐵

整天的的行程裡有一半時間都花在交通上。

過關時看見祖國的七字大名,不知為何弄得小詩的雙腿有點軟,唯有趕緊加快腳步到火車站。在經濟特區登上驅往省會的車廂裡,顯示板上的速度儀和現代化的車廂令小詩再次感覺安全。再沒有假票人佔你的座位,車廂的服務員的手推車上也再沒有賣龜苓膏、九製話梅又或者黨八股報,反之只有寥寥幾支香港品牌的健康草本飲料。

離開了省會的火車站,乘搭另一種讓小詩以為感覺還會安全的交通工具,那是地鐵。在香港的地鐵裡,小詩從來看不到乘客會自動自覺移進車廂中間位置,而在省會裡幾乎所有乘客都把這點做到了,而且還會拼命的向內擠!小詩看見一名剛成功「搶佔」車廂中間位置的母親,不斷喚她的小女兒擠來她的身邊。小女疏從車門邊努力鑽到母親身旁,看見小女孩在人堆裡擠呀擠,小詩也不禁皺一皺眉。

終於來到了下車時刻,想不到小詩親身嘗嘗小女孩的苦況。不同的是小詩一面喊著「唔該借過」、「請讓一讓」幾次,一面費盡力勁鑽出車廂,但身旁的乘客完全無動於衷。之後無論小詩如何提高嗓門結果也一樣,究竟他們聾了還是小詩做錯了甚麼?

公車

花盡九牛二虎之力趕及在車門關上之前逃離車廂,小詩還以為一切應該可以安定下來,誰知道這是另一個噩夢的開始。

這次來到省會的目的是掃墓,老爸老媽說坐專線公車去公墓會比較方便,於是小詩便跟著兩老去公車站。登上這架前往公墓的空調公車不久司機便發動引擎,隆隆的公車便離開了公車站。

一路走來也是暢通無阻,但是司機就像是嗑了搖頭丸一樣,每看到前面的車輛不夠快或者阻礙他超越前車時,按號就響個不停(其實一路上按號從沒有停過下來)。到了通往墓地公路的中間部分,前面公車的司機發現前路極度擠塞,於是領著小詩所坐的公車去抄小路。那刻小詩感覺很奇怪,眼前的狀況頗像坐在香港的紅色小巴,為求趕到目的地不惜走偏線瘋狂駕駛,但兩地的分別是香紅色小巴改道行走也很有規律的,有時候還會經電台向行家通報消息,反而小詩在公車上找不到這一點。

一輛輛的公車駛到像元朗鄉郊的地方,公車的速度儀一直維持在60公里左右,但在路上行走的村民們,看來都像不怕這架像野馬般亂走的公車。公車駛到一條村莊的小商店旁,有一輛重型貨車阻塞著路面,原本可以讓兩架大貨車通過的道路,結果因為這輛混帳貨車,讓所有車子也無法通過,還差點令公車與對頭的另一輛貨車相撞。

看到這兒好戲才剛上演,真正令人心驚膽顫的部分現在才開始!公車因為體積大,只得退後一點騰出空間,先讓對面其他小一點的車子通過。冷不防後面的小車襯著公車在倒車其間,一輛輛的從公車旁竄出來,還差點撞上公車!天哪!你們可有駕駛道德嗎?看到奧運前北京整頓民風的新聞,小詩還以為全國人民有了進步,想不到還是混蛋比較多,狗娘養的更多的是!因為公車還是不夠空間通過,一位仗義乘客下車抓來了貨車司機,叫他駛開貨車方便大家。貨車司機一登上貨車便與公車司機用髒話對罵,真想不到言論自由只限於黨八股和「只道桑麻長」的祖國,還有說髒話的自由!

貨車終於駛開卻迎來一輛從對頭開來的平治房車。「媽的!你懂不懂規矩?」,小詩心想。於是公車又再讓開,給這輛載著幾個來自暴發戶老粗的房車通過後才重新開拔。之後的路公車司機都是隨便亂走純粹摸索前路,有好幾次也是走錯路然後再把車子駛回頭。

經過一輪左轉右轉終於回到擠塞路段,然而公路上的車子都各不相讓,弄得連小摩托也無法在車龍中穿插。公車司機總不放棄找辦法超越前車,加油站似乎就是超車的好地方,一輛輛的不用加油的汽車塞滿了出入口。來到接近墓地的加油站公車司機似乎變得更加急躁,滿嘴髒話的罵東罵西瘋狂響號,一找到空位便匆匆大踏油門前進。冷不防在轉出加油站時,撞上一位站在車旁看戲開計程車的大叔,還好司機趕及把公車煞停,不然一條人命早就沒了。不過這突然間的煞車就讓全車幾十老少撞得呱呱大叫,幸好小詩和老爸老媽抓住了扶手,避免成為瘋狂駕駛下的受害者。

終於安然到站,活著真好!

城內微觀點

辦過正經事後,小詩跟兩老乘公車回到省會地段。在車上小詩紮好馬步,以防被近乎瘋狂駕駛的司機拋出車外。不知是否祖國的汽車公司觀摩過香港的公車後見獵心喜,同樣安裝了十多吋的液晶體顯示屏幕,由一家叫作「世通華納」的媒體公司提供資訊。小詩冒著生命危險了解一下兩地之間的分別。除了全部節目使用刨冬瓜和製作比較粗糙外,基本上沒有太大的分野不過有一點特別的是,黨八股或者國情知聞之類的資訊卻不曾出現,不像香港公車般將愛國資訊強行灌進閣下耳朵。

下了車已是三點多,午飯還沒有吃。老媽趕著跟朋友茶敘,剩下小詩跟老爸兩個人在省會街頭找點吃。老實說雖然羊城美食頗為出名,「食在廣州」這句口號也響遍全國,但身邊的食店都是北方口味,老省城的味道還是只能從幾間聞名老鋪尋回。之所以遍地北方店子,就是一大群北方人赤手空拳南下省會創富,毫無技能下只能像臧姑娘一樣,靠賣點撚手家鄉小菜或者小吃,希望打響名堂衣錦還鄉(可惜他們多不如臧姑娘般靈活變通,最後只能結業收場),因此食店的上下可能帶著幾種不同鄉音的普通話。

老爸拉著小詩到一間點心小廚吃午飯,這店子是北方人搞南方點心粉麵。店子模式就像美食城,自助形式點菜另加茶介。老爸的奇怪口味就不說了,小詩點了最穩當的餛飩麵、蝦餃、燒賣和叉燒包,雖然肚子已餓得沒有餓的感覺,但邊吃之餘也不忘品評一下食品質素。老實說,北方口味還是脫不掉,麵煮得頗腍、餛飩像水餃、叉燒包只是豬肉混燒烤醬包子,只有蝦餃燒賣仿得最像樣。鄰檯的老頭子點了一小煲排骨腸粉,小詩倒沒有見識過這東西,平常在香港吃腸粉多是蒸煎兩味,腸粉燴肉排倒非常新鮮。老爸說這是省會老吃法,但礙於對國內食材的戒心,小詩最終也沒有被好奇心打動,一嘗這道省城美味。

老爸沒有小詩諸多的心理障礙,面對美食一切少理,甚至點來一碟油膩的「鹹煎薄撐」(即「唐人披薩」),可惜吃不下只得打包帶回香港。小詩喚來一位侍應,問他有沒有飯盒給我們打包。這位看來只有十來歲,操國語又長得頗像大鼻佬兒子的的小伙子,一臉傻氣的聽著小詩爛到不行的普通話,想了一會終於明白面前這位笨蛋的意思。

「飯盒?」(fan4 he2)

「死呀死呀!」(是呀是呀)

小詩接過小伙子的聚脂乙烯泡沫飯盒,隨便說了句「謝謝你啊」,想不到他竟帶笑禮貌回答一句「不用謝」。天呀!這小伙子是小詩在神州大地見識過,擁有最天真燦爛笑容的男子,最有禮貌的侍應生。回過神來,小詩又是一聲嘆息,這顆白璧無瑕的赤子之心,相信很快被他粗穢不堪的同事教壞。想起上年報道花旗搏擊高手也在東方紐約被幾個小混混弄得人財兩失,面對神州裡的烏煙瘴氣扭曲世道,就算任你從滇黔之地帶來的清清溪水,來到珠江口一樣是混得分不出顏色來。

「吃飽喝醉又是時候歸家去」,飽餐一頓後又回到城際鐵路站,這半天的路途上還沒有見識過省城在全球化國際化現代化人文文化的模倣道路上怎樣走。來到省城鐵路站,小詩把握登車前的半個小時觀摩一下幾年來省城的變化。

在車站的國際品牌便利店內,小詩找到兩本跟香港某些周刊封面設計甚為相似的刊物。其實與其說相似不如說是倒模。因為除了上面那本之外,另外一本翻模自香港方向週刊的刊物,其實也是和本地某倒向祖國的傳媒機構甚有關連。假若這兩本東東能夠將神州子民的陰暗面再次無限放大,一定「功德無量」。

便利店的隔壁是傻強快餐店,老實說這快餐連鎖集團在神州已混了超過十年,當年小詩曾在省會吃過其不倫不類的煎腿蛋配瘦肉粥早餐,來到現在裝修賣相和價格越來越與香港同步。點菜板上一個奉送凍飲的港式三丸麵餐,已經索價廿七塊錢,與剛才小詩跟老爸在點心小廚一共花費的五十不到價錢相比實在貴得離譜。觀摩一輪與香港無異的餐牌後,小詩決定往對面星爸爸點杯合法毒品提神,順便觀察一下老外和神州子民之間的相處模式。打算點一杯雙倍合法毒品(Double Espresso)的小詩,甫進入店內已被其十八塊的價目嚇了一跳。「操你媽X!」,小詩想要的只是一杯提神毒物,若要花上一般羊城市民近二個巴仙的月入來提神實在不可接受。還是算了罷,只好多嚼幾條口香糖,待登車過後再小睡一會。

(2008年9月15日完成發表三篇初稿,10月31日完成合併及重新修改。)

星期四, 10月 23, 2008

純粹創作-睡午覺


昨晚熬了一整夜,讓這個本是令人充滿活力的週末帶來沉重的感覺。吃過中飯洗好碗碟,躺在沙發上漫無目的玩弄著手中的遙控器。

閃動的電視畫面真是一種不錯的催眠藥,很快腦海便回到兒時的片段。

跑跑跳跳完全充滿了生活之間的空隙,停不了的玩樂令人消除了睡意,所以幼兒園裡的午睡時間總讓人感到無比煎熬。每天下午總不得不裝上一個小時的死相,或者故意模仿扯鼻鼾的怪聲打發時間。

想來午睡此終都是成年人的玩意,至少現在我的眼皮和肩旁細長的呼吸聲能夠說明這一點。

星期三, 10月 22, 2008

小詩隨筆107

再見細細粒


祝愛美神導彈和那些八卦雜誌探測器從此保持距離

-------------------------------------------------------------------------------------------------

甚麼叫做"Pro"?

"Pro"是"Professional"的簡稱,中譯「專業」。

"Pro"這個字眼是打工仔的一個夢魘,是上司的不滿,也是上司的脾氣。

牛津字典和國語辭典都不約而同將"Professional"和"專業"解作「精於某範圍或事業」,但其實我們時常在老闆的「專業思想」下不務正業。

客戶眼中的專業態度是一種意識形態,就是老西骨骨,親切的眼神笑容,急速冷漠的聲音。又或者是這樣.....

「乜你咁唔"Pro"架?」(客戶責怪腔)
「嘩!你好"Pro"呀!」(客戶滿意腔/被佔便宜後)

當下"Pro"的意思,只不過是說明「你不過是一名奴隸」,又或者說明你根本不是專業人士,更重要的是若你不照著辦,便得收拾幾十歲的小孩撒野後的爛攤子。

所以,「唔該你"Pro" D啦!仆街!」

-------------------------------------------------------------------------------------------------

聽沈振盈不如讀沈旭輝

http://hk.news.yahoo.com/article/081019/4/8sm5.html

向獅子山說再見!

------------------------------------------------------------------------------------------------

十年被忽略的改變-他們究竟是誰?

「阿爺」: 滿街孫子,但是找不到阿爺

「某某」: 兩個偉文的一種令人莫名奇妙的歌詞 (例子1) (例子2) (例子3) (例子4) (例子5)

星期三, 10月 08, 2008

小詩隨筆106

另類語言

近來出席了不少「應酬」,結果小詩弄至胃痛,夜半到急症室尋求解脫之法。

來到診症室,為小詩斷症的是位看上來近五十歲的先生。香港的醫生有一特點就是斷症快而準,一分鐘不到已經瞭解小詩所患何疾,接著詢問一下小詩生活習慣,看看應該有何訓示。

醫生換個懶懶的姿態,慢慢地用自語自語的語調向小詩訓話
「或者早D訓啦.....我同我自己講o者....」
「飲多D奶會有幫助o既....但係唔好飲三聚氰胺(Melamine)奶囉!又其實都唔知邊隻奶冇事~」
「飲咖啡就落多糖多奶囉,咖啡有咖啡因刺激個胃」
「黎過幾次喎...都係果D事啦~」

年近五十仍留在公立醫院當A&E醫生,確實令人感到奇怪。年紀頗大仍要在晚上的急診部工作更反映出這公營醫院流失人才的季節,生力軍也真走得七七八八。面對奇型怪狀的病人,恃老賣老的老婆婆,抱著女兒卻動輒操人老媽的燥爸爸,壓力之大可想而知,只能在看似正常人的小伙子面前胡說八道輕鬆一下。

這種暗藏壓力的語言可謂冰山一角,記得數年前小詩在某醫院動手術,那兩位男護遊戲人間的外在表現就叫我大開眼界。身處上有壓力下有「暴力」之間生活,只好埋首在瘋言瘋語裡面,讓根本活得像瘋子的病人覺得自己是瘋子,其餘的一眾理性病人就只好摸著頭慢慢參透箇中玄機了。

----------------------------------------------------------------------------------------------

芝麻湖


羅倫士博士說廣東話就是充滿趣味,出其不意的冷笑話實在比無記編劇送給荷媽的「爛gag」高章得多。

以下為2008年9月30日的例子

「你地講芝麻『湖』嘛,係Sesame Lake!」

因為羅倫士的"Sesame Lake",小詩以後會笑著吃芝麻糊了!

----------------------------------------------------------------------------------------------

朋友,真的錯有錯著

在面書中找錯朋友,一向都是件丟人的事情,這一次便「不幸」發生在小詩身上。

一直都在找某位間中見面但又甚少交談的朋友,因為在朋友堆中在找了好幾回,只好用其名字在搜尋器中找一趟。忽然小詩發覺有一名相貌相近其他資料也非常近似的名字,二話不說便「交朋友」,後來對方接受邀請,小詩入內看清相片卻發覺不是那回事。

細看之下小詩發覺原來交上的是一位,曾經被小詩認為只是相見而不會相交的女生,經年前看似不可能的事,現在卻妙不可言。「朋友」是找錯了,但「錯有錯著」。

-----------------------------------------------------------------------------------------------

十年人事

「去年今日此門中,人面桃花相映紅。人面不知何處去, 桃花依舊笑春風。」(唐●崔護—《題都城南莊》)

十年過去,我們長大了。我告訴你們我認不出你們,這是真的。但我有些心結未除,所以我來不了。有些人如我般外貌改變很多,有些人卻避開歲月的變化,今昔如一。緣份未到,時機未到,讓我的粗言穢語離去以後再作打算吧!

星期五, 10月 03, 2008

小詩隨筆105

不正常社交

一向都自以為自己o既社交生活幾正常,幾個月出黎同班朋友食一次飯,平時係MSN吹兩句水。直到見到而家身邊o既同學仔同Fred o既離開,小詩先覺得自己好有問題。

有Keep Contact o既朋友實在太集中,但集中得黎又見得唔密,最後造成左「這麼近那麼遠」o既局面。呢一刻先明人與人之間o既友誼係建立係同一時空o既接觸同經歷裡面。

Internet, Wifi, 手提電話永遠都只會係實時messenger,唔會係communication,亦唔會俾到你relationship。

我都係時候join/organize多D活動o勒.....

--------------------------------------------------------------------------------------------

自我谷底

近排心情真係好差,差到唔想講野,又係笑都唔識講,個腦完全實晒。咁大個仔都未試過連自己份信心都輸埋,面對眼前o既挑戰,個腦居然估計自己會輸。

雖然小詩無捻住主動識新同學仔,但平時一D應該開口o既句子,我都無乜心情開口講。到前日同班同學仔加博士等一干講師食飯o既日子,小詩都係夾硬黎講野扮下正常人,我唔希望俾佢見到我表面有咩唔妥,呢D無謂野唔好要D大忙人擔心。

睇到呢度大家可能會懷疑小詩係咪炒輸股票,雖然小詩而家心情同個金魚缸一樣咁沉,但而家無貨係手。而家仲度緊自己有幾多子彈準備出擊添!

我知呢個時候係我其中一個人生谷底,都係埋首同本書裡面D廢氣溝通下......

--------------------------------------------------------------------------------------------

Who will care about this news?

太空人歸來第一餐四菜一湯

-------------------------------------------------------------------------------------------

真係爽!



Omarosa個八婆終於被炒,個心當堂涼晒!上得山多終遇虎,今次同Piers正面交鋒,Piers用行動証明左Omarosa只係一個娛圈嘍囉而唔係名人,7000蚊同164000蚊o既結果比真係笑大人個口。輸得樣衰都唔緊要,仲要俾人睇到個八婆有幾卑鄙,用「屈基」手法誹謗他人,仲勁過驗尿勤!不過Piers今次學精左唔再發老脾俾機會個八婆捉痛腳,反而玩野一野咀落Trace度,牛仔Trace無奈地做左「Brokeback Boardroom」o既主角。Omarosa見到Piers明玩野仲笑住死撐「你睇佢仲唔係基?」,結果個八婆一毫子都捐唔到就被炒上車走人,上到車仲夠薑教訓Piers「Everybody is your teacher」。人地Piers就真係「Give you a lesson」,你個八婆都係算數吧啦。

--------------------------------------------------------------------------------------------

Pop Rock Favourite: Soler - "Fiona's Cafe"



-------------------------------------------------------------------------------

想不到

又真係估唔到唔送Frederick機,係因為小詩將會胃痛入埋A&E!

What the fxxk Man!

星期四, 10月 02, 2008

給我們的好朋友-一路逆風向前(A Blessing To Our Best Friends, Bon Voyage!)



據朋友說,帆船要一路順風而行才會容易抵達目的地

飛機卻是另一回事,只有逆風而行才會飛得四平八穩

今天,你們要往他鄉創造事業,前面還是好一大片未知之地

願你們一直跟你身處的飛機一樣向著最終目標逆風而行,最終順利抵步。

This post is specially giving to Frederick and Max. Their leaving and their current career has inspired me a lot, all these gave me a good lesson in my life. Bon Voyage My Friend!

星期日, 9月 21, 2008

小詩隨筆104

心.死

忽然間,小詩唔知自己仲可以寫咩好。

關於果類時事問題,我唔知講咩好。行動方面除左為我心愛o既大白兔奶糖流眼淚之外,我最多講多句唔該當眾槍斃班糧食部同三鹿高層,以儆效尤。

稚子何辜,蒼生受苦。其實過左呢件事之後,我已經對國家心死啦。

積習難返,恕我此等賤民有心無力。我以後真係唔敢係外國人面前認自己係中國人,我好醜,醜到唔想認自己D同胞,醜到想打李敖,因為佢夠薑唔認佢自己都係醜陋的中國人o既一份子。李敖不但只醜陋,仲無恥到無視民族不斷重複犯錯,令到民族禍劫重重。

去你媽的,祖國。

操你娘,李敖。

---------------------------------------------------------------------------------

停筆

因為知道自己終有乾塘一日,所以都捻過下。

暫時來講手頭上都仲有幾篇野打緊,又唔會真係話咁快就停,不過我都寫到停晒手。

其實,我都係捻下o者.......

--------------------------------------------------------------------------------

獨渡十八

小詩重新將自己o既身份塑造成一個過客。

係開大o既日子,十八個月話短唔短,眨下眼又過左去,其實我無咩必要去理咁多其他人o既事,況且我都唔想理。雖然係有D舊人係小詩隔離,但佢地o既存在對小詩來講都不過係幾片雲煙,所以我選擇接近沉默。

佢地蒲飲吹,小詩做唔到。寧願夜媽媽靜靜地傾下計心事寫下D無聊野,我覺得自已會充實D。因為錢使左落去蒲,我買唔到我想要o既快樂。

套番落去現實,小詩同佢地點齊齊玩都好,我唔會覺得我有十八個月o既愉快學習。

由頭到尾,呢個旅程都係充滿住悲傷o既。

星期一, 9月 15, 2008

小詩隨筆103

我一次又一次咁唔記得對自己講過o既野,結果搞到自己咁唔開心。錯,都係自己o既問題。係我最唔開心o既時候,睇到文化梁兩篇文章,終於都記得晒。

文章1

文章2

我而家覺得尋晚send左個爛gag message都無所謂,其實個message應該所有我識o既人都應該收到。我決定今晚怒send message...

呢一刻,我發覺自己灑脫左。

------------------------------------------------------------------------------------------

修養

星期五就返左地標工,撞o岩有兩件事都係果邊發生。小詩就見到唔少平時係鎂光燈下先見到o既人物,例如牛河博士、公公同龍婆。第一眼見到佢地當然係無乜感覺,因為都係做野o者,但同公公、龍婆之間o既接觸就令小詩有D唔同o既睇法。小詩係做招呼或者做仙童指路,牛河博士好平常地係小詩面前掂行掂過,反而公公同龍婆就好有禮貌,唔該前唔該後,公公仲一路拍拍小詩個背脊一路同小詩打招呼,搞到小詩都幾唔好意思,第一個反應就覺得佢地真係一個仁慈o既長者。

同樣o既經歷唔止發生係小詩身上,仲有騎住隻猛獅周圍舞o既師傅。師傅話龍婆係隻獅子裡面落黎o既時候,特登企係佢隔離同佢面對面講「唔該」,師傅都呆左一呆,話未見過D名人咁好禮貌。因為師傅話佢上次係半山舞獅果陣,見到一個係鏡頭前扮晒好人但現實上擺晒款o既廿五歲老坑。

或者應該咁講,公公同龍婆都好尊重每一個存在o既人,佢地果份尊重會令人產生敬意。

之後有《The Greatest Love Of All》o既Composer加佢老友係度玩爵士,幾十架平治寶馬凌志乜鬼七人車都有,唔少所謂名人真假洋人都有出現,落車o既人裡面有主耶穌,佢一落車就怒氣沖沖咁款衝入門口,唔多理同行o既人。

生果照妖鏡下o既人物小詩不嬲唔多信,不過見到真人比較下每個人o既脾氣,言行舉止禮貌,就明白點解D記者咁鍾意掀D新人或者出位名人陰私,原因不外乎因為佢地無修養。

做人係可以隨性,但唔可以無修養。

---------------------------------------------------------------------------------------------

好景

小詩唔係想講買四仔果個商場,大家唔好心邪。

講起國子監,好多人都話小詩而家學習緊果科好好景。

查實有幾好景?一查薄扶林國子監零六年類近科目o既畢業生就業情況,原來薪酬中位數得一萬蚊。小詩仲要唔係薄扶林或者馬料水門生,係呢個血統論o既社會可想而知會有幾難捱。

或者你會鬧有一萬蚊仲想點?唔好睇得果少少,當你見到最低有人七千蚊起薪點o既時候你就鬧唔出,真係同一個私人屋苑保安差唔多。讀個哲學碩士(Mphil.)交完學費都仲有七千幾蚊使o既時候,你仲要用果七千蚊還埋學士學費,都咪話唔甘。

陳克勤條仆街仔係立法會選舉打住「年輕就是力量」o既口號,唔撚好意思我真係唔知佢幫唔幫到我地班讀理工科o既國子監畢業生尋找佢地生存之道,吸毒濫藥果班人係要理,但佢地真係唔會得閒去投票,況且人數少得咁緊要,你幫到班後生仔搵到餐食好撚過搞驗尿。可惜條仆街仔一世都唔會理,人事好過博士,自己過撚左海就係神仙。做凸手助理七萬蚊已經搞到腦閉塞,唔係流肛帶挈佢而家都唔知有冇果六萬俾佢醫病同搞街坊旅行,仲會得閒捻辦法理你成班十萬計廿歲出頭俾人鬧食塞米o既靚仔?

班無腦三姑六婆成日同我老媽講「你個仔畢左業一定搵好多,唔使擔心啦」,真係除左我地父母之外,都無人理我地死活,仲要俾班政客抽水真係好撚唔抵。所以都係果句「你班八婆師奶仆街去啦,民建聯班垃圾黨員我屌你老母,陳克勤你老母生撚左你個仆街仔真係家門不幸」。

唔係賴邊個,我地年青一代靠自己只可以養到自己,想好景都要俾機會我地發圍先得,但邊個會得閒理我地?係咪要等到發窮惡先理?

星期三, 9月 10, 2008

小詩隨筆102

抉擇.時候

通常我去買一本書會有兩個原因:合眼緣或者我真的很看想這本書。在書店裡左逛右逛一輪,心中總會有個定案,哪本書我會買;哪本我不買。面對一些合眼緣但不知內容的新書,為免自己七上八落的心情現於人前,小詩就會把心一橫,將之匆匆帶往收銀處,回家後才開慢慢「解決」。付錢過後,緊張的心情又來了,害怕會「買錯書」、「買貴書」......

閱後經年撫心自問,有哪本我買的書我會看多過三次?是我當天太衝動,還是我太花心?



-----------------------------------------------------------------------------------------

投票

曲終人亦散,小詩終究也沒有去投票,因為工作關係和約了朋友在區外吃晚飯,早出晚歸回到家裡已經過了投票時間。投票通知書還在我書桌的抽屜裡,投廢票的的機會已經失去,想來只好留來做個紀念。

在圍雞百科看過今次選舉的方法,細看之下比例代表名單這種方式只適合製造政治明星。特首口講要推行培養本地政治人才,另一面卻不改善議政制度。老實說保皇黨的鐵票都是來自旗下區議員的支持者,而非當選者本人。儘管區議員本人能為人民做好事,並不代表其黨內參選立會同志也以相同態度服務市民,加上區議會政治氣氛淡薄,區會議員對議論政府新民生政策敏感度上遠不及立法會,所以投票過後「所托非人」機會甚高。假若以多議席多單制加上普選取而代之,定必製造議政者之間良性競爭,不論民生議題還是政治取態均最能反映選民意願。

現時制度下製造的另類弊端就是為低票者提高當選機會,諸如去屆長毛今屆訓街卿等。加上本身以權貴為主導的功能組別,若不再加以改革,香港的政治生態將藥石無靈。

------------------------------------------------------------------------------------------------

坦白

我連一個暗號也不能理解

也許....我不應去理會

但我面上的表情無法掩飾,我無法從眾人的神情釋除我的猜疑。我面上難堪的表情相信這是一年裡抑壓過後的小爆發

今日我在快餐店打翻了汽水

結果我在歸途中的車廂裡沉思一個問題

"我"的極限是甚麼?

結果我得到的答案並不是給我本人的

「眼前再殘酷再駭人的現實我也能夠努力面對,其他人亦然;然而最能將所有人際關係摧毀就是無止境的猜想和隔膜,長期內心折騰令本來平靜的畫面變得凶險,空想幻象令人失去理智」

我清楚我應該坦白

但我也清楚我不能夠坦白的原因

因為我的坦白是屬於你

而我的不坦白是屬於我的

星期二, 9月 09, 2008

今期播放26


MC Jin!幾年前Freestyle Battle裡面《中國人Rap贏黑人》o既主角
今年黎香港想做「新人」
點知唔係電視台親生仔屈唔到機
唔緊要...將美國式街頭Rap音樂文化帶黎香港
等班香港音樂盲毛知道
其實相比之下香港D Rap Group都唔輸蝕
呢首《即食麵》個Beat幾輕鬆
對香港人來講幾易入口


雖則話易入口
但係對班老聽眾來講仍然有難度
係慈善Show度Rap簡直擺明同班想睇折子戲o既老人家過唔去
況且Rap文化裡面果種隨意o既歌詞完全文藝色彩欠奉
又難怪有個阿姐睇到O咀o既.....


MC Jin歌曲o既主題都係一個個貼身生活化o既小點
好似呢首《飲啖茶》輕鬆惹笑絕不說教
將廣東人飲早茶文化由食品到品茗過程續步唱出
加埋「爭請客」呢個中國人「特點」
聽完真係會心微笑!爽晒!


聽D新歌又係慢人十幾拍
恕我膚淺加白痴,睇完個MV都完全唔明佢《十七度》想講咩
咩不妥協不安唏噓好似同十七度隻角無咩關聯
假如話相遇再分開,OK o既...
但你唔過90度都係一樣o者!
講番首歌,發覺Kay o既聲線係個編曲幾強o既Beat下顯得軟弱無力
甚至係chorus飆高音果陣好易唔多到
如果首歌由莎莉葉黎唱的話應該會正好多


呢條片比較細聲,首歌係牛尾君..唔係!
應該係Prudence Lau o既《私人補習》
歌詞真係挑戰底線....挑起你把火!
唔好問我邊個寫o既,我真係估唔到會係佢!
不過如果可以日日係明光社度播...
捻起蔡志森聽到會有咩反應都覺得正!

星期四, 9月 04, 2008

快味上海街







一年前,小詩撐住雨傘提著公事包,懷著沉重心情踏上唐樓的梯級去完成我的工作。

一年後,小詩帶著哀傷心情攜同相機去隨意拍下所見所聞。

失控、放縱已成了我失敗的標記....

當日一名只得中三小妹妹問我為甚麼要拍上海街

今日警察問我在上海街幹甚麼

拍甚麼有甚麼用....

我已經在路途上遺下答案了

星期二, 9月 02, 2008

再度回味8


雖然「潮左」但係都必須講下
城城用左三四年時候寫左首垃圾都不如o既歌仔
人地用左三四日就將佢首歌完全膠化
講真...城城不如你收皮好嗎?
講Melody似夏金城
但lyrics真係完全不知所謂
我唔信有人聽完一次會記得首歌o既chorus囉!


真係好好笑....
「男朋友好細個,D老婆又亂晒籠o既」
「有個男朋友拎一萬隻蠔豉煲粥」


係當年未有性傾向歧視條例下都做得出呢種節目
亞記真係好野



星期一, 9月 01, 2008

小詩隨筆101

做老大.做馬仔

俾人隊左上去做大佬,就發覺咩叫做「夾心階層」。曾幾何時「夾心階層」係一個住屋計劃,即係俾D有錢但唔富貴o既一群用比市價低D o既價錢賣間質素ok o既單位比佢地。可惜人做夾心我做夾心,小詩真係幾不幸囉,即係鎚仔泵釘釘泵木。

不幸中o既大幸係有唔少人做左D野令小詩無受箭,但下面o既壓力就有如子彈一飛飛打到小詩無晒乎。近幾日返緊屋企果緊都無再睇書,反而係度捻下自己D管理手法有咩問題。小詩唔係一個叻仔,人事手法差勁。老媽就同小詩講「一樣米養百樣人、若要人似我,除非兩個我」,但係講真叫班人準時返工呢家野,都唔係太高要求o者。好彩下期唔使做大佬,等下個黎接手搞班麻煩友。

勞氣野就唔講o勒,睇完無記鬼佬台播《Celebrity Apprentice》又發覺自己都唔係好慘。你睇下Piers Morgan俾Omarosa個八婆玩到火都黎。真係X人還X人,唔好講人老母屋企D細路丫,學Piers話齋「如果你條X街杏家橙係男人的話,我實會好似劉易斯一樣一拳打爆你個頭呀!」



-------------------------------------------------------------------------------------

開學

難得十九年黎第一年唔覺得人地要返學我唔使返會充滿罪惡感,因為小詩有工返。不過我有認真地考慮過埋下期仲做唔做地標份工。其實咁耐都無溫過豬,小詩對博士教果D野都忘記得七七八八,都要搵D時間搵返個底。小詩至驚就入到Lab完全對自己做緊o既野一無所知,過多幾日小詩就會去開個大,搞埋D手尾之後就會做天子門生,所以都係時候開操o勒。

唔知三日之後O day會發生D咩事呢?

---------------------------------------------------------------------------------------

投票

因為阿郭生飛張表埋黎所以做左吮民,查實對election呢家野一向極其討厭。皆因個個candidate都好乞我憎,本身有幾個都係個好選擇,但因為佢地取態極度保守仲有同盲光o既關係密切,所以都揀唔落手。

「民主就是從爛蘋果堆裡挑一個較好的」呢條道理已經聽過唔少,今次輪到小詩揀。其實小詩而家有兩個選擇:
  1. 將個爛蘋果掟落街,將隻癲狗放入垃圾會繼續亂咁吠,大家有花生食。
  2. 掟晒D爛蘋果落垃圾筒,聽天由命繼續發臭。
講真如果政府真係咁想要小詩張票的話,我咪請大家食花生囉,食花生都總好過俾個三十出頭o既低能仔入去。雖則垃圾會係垃圾,但唔係疪護工場囉!

如果果九杯茶變晒做蛇羹齋菜你話幾好....

--------------------------------------------------------------------------------------

今年又唔記得左Blog Day
講真今年subscribe左幾多個新Blog都唔記得囉~

做一樣都好耐無做o既野
希望佢會聽到....


星期日, 8月 31, 2008

小詩隨筆100

這樣子就寫了一百篇隨筆,小詩這次首先要再來盡情怒罵一次。

窩囊廢的高層自然就是麻煩製造者,小詩所指的就是CHKCI。因為其朝令夕改的政策、欠缺成熟的應變機制,只向錢看的窮兇極惡凶相,都害得各方叫苦連天。每每受到客人面斥是非的並不是深水涉區議會的老西議員或者CHKCI的垃圾高層,而是像小詩一樣站在前線無需負上任何責任的場地員工。回看九號風球那一天youtube的影片(明顯地部份暴民的「粗言穢語」經過特別處理),我真想問那群暴民他們對「生命安全」的價值是如何衡量?我真想問CHKCI是如何理解「八號風球」的意思,求財是否必需不擇手段?休業一天保障各方安全是否比登天更難?也真想問一下CHKCI和曾健成(阿牛)對自身一面「撈選票」不講道理,另一面以協調者自居行假正義的行事方式有否感到羞恥?

那群賤民在騷動中的「傑出表現」,實在令人難以忘懷。以下是當日曾經發生過,但報章永不會報道的其中幾個事實:

  1. 有場地職員曾經被人用手指戳向太陽穴,並大罵該職員「豬咁蠢」及侮辱其家人
  2. 下午騷動時分,有人報警求助指該場地機構「涉嫌詐騙」,其後因不得要領,再向警方致電並向電話大呼「你地D警察係咪唔黎呀?係咪要我打人先黎呀?咁我打人架啦!」
  3. 九號風球騷動時分有人自稱數小時前從愉景灣坐船趕來參觀電腦通訊節。
對於肥醫生所說的資訊流通問題正正就是「電腦通訊節」主辦單位CHKCI的死穴。CHKCI和深水涉區議會作為主辦單位,絕對有義務令所有市民在任何媒體能夠接收節目相關詳情,他們不明白發放消息的傳媒流於鱔稿形式,只會集中報道場內產品如何「抵買」,而不會將場地開放票務安排的相關資料向大眾發佈。儘管傳媒如此差勁,但提供最多資訊的大會網站亦同樣未能發放即時的清晰資訊。例如各屆市民於8月23日當天,絕對無法從網站瞭解業內人士免費參觀時段的詳細資料。結果當日小詩早上便被公眾人士破口大罵指責我們沒有一早明確發佈,一時前公眾不得入場這條資訊。(據稱當天因為早上排隊的公眾人潮過多,結果曾有部分時間「偷步」安排持票公眾入場。大會入場規則朝令夕改,令一眾場地職員無所適從,最後再次引來公眾責罵。)

電腦通訊節本身已為一種超市割價式集體消費活動,對於為業內人士提供產品技術交流平台的角色早已消失。這一個失德的主辦機構配上一個失敗的展覽文化,小詩實在無法想像CHKCI為何仍可厚顏宣佈今年完滿結束下年八月再見?

---------------------------------------------------------------------------------------

講女

工作其間也不乏留意場內的showgirl,並與一同工作的一位女士暢談女性問題。

香港女士供人觀賞的外表多數不俗,唯身型方面多不獲讚賞,原因在於「無腰」。其實香港女士並不是如此差勁,只是青春期其間進行節食,胸部臀部的脂肪積聚不足,影響建立整體線條(胸腰臀)的勾勒,無法表現女性本身線條美感。所以縱使眾多樣子標緻貌美如花的showgirl在小詩身旁經過,「無腰無線條美感」仍讓不少女子剔出小詩"Gorgeous Girls"的名單裡。

小詩在相女方面當然未敢稱得上有甚麼經驗,況且本身為人並不灑脫,不能像菜生一樣相得簡單脫俗。不過菜生的二分世界卻讓很多自命「溝女多過吹水」的多情公子自愧不如。

-----------------------------------------------------------------------------------

暑期大計

小詩本身的暑期大計多籮籮,可惜計劃內長篇作品沒有完成,相片還沒有去拍下,博物館還未有空進場,只有金錢目標達到了。看來要抽點時間利用餘下假期完成目標,否則學習時段重臨,想要去完成它們便更加是漫漫長路了。

-----------------------------------------------------------------------------------

閱讀推介

梁文道-陳水扁上了一堂啟蒙課(按此閱讀)

P.S.看見文章底部評論有網民寫了一句「梁先生,靠你了」,不禁打了個冷顫。因為認為自身力量渺小而推諉過之,假若中國人人如此,誠萬年之後中國人也不能於世界挺起胸膛做人。中國人呀中國人,你們何時才會懂集合力量團結向前的道理?

星期四, 8月 21, 2008

CS事後感

小詩而家係香城內港最凸出o既一棟地標做野,就係著住件Polo Tee好似唔使點郁果班後生仔。

本來想一次過寫篇野鬧盡所有無理o既客仔(甚至係香城人),包括載住火雞領事狐假虎威o既老坑司機、撩我打交o既中年怒漢、因為等車耐左而「問候」我o既年輕太太、仲有「挑三柴」賴死唔走o既花甲大叔。下左肚火之後發覺都係谷住道氣,但過左今日我又有唔同o既睇法。

今日走去食餐飯,目的係班大老闆慰勞我地呢班佢地眼中優秀人才o既一次聚餐。從來自風笛之鄉o既洋老闆手中接過張cert同封類似利是o既物體,我發覺CK老闆果句「後生仔留咩力?」真係有D道理,當然係講係無人事o既情況下啦。只要係間好o既公司做野,出100%力為人為己打拼下無咩唔好,最緊要老闆睇住D下屬o既o者。

講番一下我同班兄弟不為眾人所知o既一面,我地班人每日做o既野唔只係曬,聞香城內港o既臭水,幫D阿婆師奶搬D醫肚用品(講起就覺得香城人係癲o既,戰爭時期都無咁癲,最激果次見到四個人拖住十個30吋o急),仲有就係做最惡頂o既CS。CS唔係你服務週到就得o既,CS o既目的係令到發生你面前o既人同事變得更加順暢。有時細心體貼俾多D選擇俾D客反而會招惹更多問題,因為人係貪心同自私o既,最好波就餵到埋龍門口,送禮就貼心樣樣有日日唔同。「顧客永遠是對的」已經Out左,小詩發覺點樣堅持幫顧客揀個最好o既方法先至係王道。「做人做到底,送佛送到西」固之然好,但唔少時候你都係有心無力,幫人都要有個限度,揀個已經幫到佢,但又無損你工作範圍o既方法好緊要。

呢幾日小詩自問除外星期一特登渣流攤之外,日日都load到自己去到maximum(做到個人勁stiff)。假如CK老闆真係睇到呢篇文的話,小詩想同佢講句:「我呢個後生仔早排唔留力,而家就病病地。」

好彩聽日打風,叫可以偷雞抖多日。

多謝各位睇我呢篇廢文,真係感謝神恩,保守我繼續掘金!

星期二, 8月 12, 2008

小詩的很多個為甚麼(1)

Q: 為甚麼要擺脫港式英語口音?

A: 因為落Pub酒吧比較容易把女,還有提高推倒的機會。

Q: 為甚麼不用擺脫港式普通話口音?

A: 因為大家北上主要都是尋花問柳,函意上「小姐水餃一碗多少錢」和「小姐睡覺一晚多少錢」基本沒有分別。其實你都是想泡那位妞,然後將她推倒......是不是?

Q: 為甚麼小詩的老大是基督徒而小詩不是

A: 因為所以而且但是,前因後果一言難盡。

Q: 究竟我們追求的民主是甚麼?

A:一般人只從譯名字眼來認識民主,一是特首提到的文革,由「人民」控制一切;另一種是阿爺的想法,人民的主人。然而民主並不是選部落酋長,大家坐下來找個人來當首領,然後服從他的所有指示。一人一票的機制下選出來的頂多只能說是代理人,也就像保險經紀,為大家爭取、建立、創造最適合的生存環境。當然最重要的是,像保險經紀一樣,假如大家不喜歡他的話一樣可以把他換掉。

Q: 為甚麼我們老是那麼害怕阿爺?

A: 原因是因為他欺騙我們太多次了,有所謂一次不忠百次不用。至於關於移民的問題,全因為大家都不想做奴隸。大家看不到國歌首幾句也教大家「起來 不願做奴隸的人們 把我們的血肉 築成我們新的長城」?結果大家都起來跑到外國去,把他們的血汗和骨肉都帶到國外築他們的長長的中國城。

Q: 為甚麼上了年紀的男人特別多口水?

A: 因為發覺半生成就不多,只好吹牛拉雜成吹,換取無知小妹妹小弟弟的掌聲和羨慕眼神。其實人生閱歷各有不同,不過太陽底下無新事,聽多了也會悶。所以這些上了年紀的男人其實挺悶壞人的。

Q: 為甚麼中國人老是最被人看不起?

A: 因為面子是別人給,架子都是自己丟的。想知道真相可以先讀過哲學,然後看一看評論國人的經典,在哲學系統內放下成見之後再細想緣由吧!

Q: 為甚麼靚仔不一定溝靚女?

A: 這不是生物問題,是機會率問題,還有雙方需要甚麼的問題。

星期五, 8月 08, 2008

不知不覺來到三條八

不知不覺

近排好多野都不知不覺做左/發生左....

以為自己做CS實死無生,又做到
以為要等下世要有條新o既老牛,點知因為要返工又買左
以為呢世人入唔到大學,點知又碌左入唔知邊間
以為今個暑假會長期係屋企混吉,點知今年暑假搵到o既水會係歷年最多
以為今個暑假不是讀書天,結果係度睇書...仲要睇細路書!
以為行街買野一定幾個鐘仲會最後兩手空空,結果唔夠兩個鐘已經成手係野!

其實我其他係個心度捻緊果D,又會唔會不知不覺完成晒?

------------------------------------------------------------------------------------------------

我真係唔覺得有咩野一定要咁興奮
平常心面對大大小小o既事咪幾好
所以奧運開幕果陣我會返工....
到時搞咩都唔關我事

講真...真係關我咩事?
雖話東道主係祖國
但奧運係全世界o既事
而唔係淨係屬於祖國o既
無記果句仆街slogan「我地就係奧運」
完全融入左祖國好大喜功自吹自擂o既陳年惡習裡面

祖國搞到個奧運會係件好事
但又唔代表我地有咩比人驕傲o既事情
D政策經常矯枉過正
人地著件衫個都要管
咁D贊助商點搵食?
唔通個烏巢都唔俾賣廣告?

仲有對付D搞事份子唔一定要夾硬來
試下人地著件「雪山雪糕衫」係度大叫咩人權
你笑笑口走去同佢講下道理(握埋手佢實理虧唔夠你玩)
然後請佢去示威區
睇下邊個會蝕章D?

都係果句,大國崛起唔係淨靠基建
人民素質都係一個重要元素
唉~捻起墮落中o既香港人
香港「國際都會」個朵都唔知仲有幾耐貨仔玩下....
做人爭氣D用下個腦
就唔使出醜人前

星期四, 8月 07, 2008

感恩中央照顧.報告同胞!



致這位充滿怒火的同胞:

我們香港市民實在待慢了你,小詩感到萬分內咎悔不當初,後悔為甚麼不曾向曾特首提議「人定勝天」這條硬道理。全港市民應一人一口氣把「北晃」這鼓泯滅人類良知,阻礙十三億同胞裡任何一位前進的反革命熱帶風暴吹走。在此小詩作出深刻反省,寫出眾多中央一直以來照顧香港的例子,報告各位同胞我們香港市民絕對應該感謝祖國多年來的眷顧。

  1. 假如不是領導中央政府的共產黨建立了新中國,把資本家趕到香港去,香港的老一代還享受不到資本主義的甜美果實,李超人也當不了世界級富豪。

  2. 假如不是當年毛主席不立即收回香港,英國佬還不會對香港市民搞那麼多免費教育、醫療建設、灌輸民主意識的花樣。

  3. 假如四十年前祖國不是在搞文化大革命,香港某些市民還掌握不到製造武器技術,我們還不知道我們香港市民是最有行動自由學術自由,最有人類良知的中國人。

  4. 假如不是女同胞跑來香港掙錢救自己老鄉,香港的窮光棍或者有婦之夫還不能從溫香軟玉中體驗資本主義中帶來的萬惡之首。

  5. 假如中央政府不是先讓香港市民富起來,香港商人還不能在祖國掙錢,香港男士還不能在包小老婆的過程中體驗「江山如此多嬌」,「三妻四妾」等故人情懷。

  6. 假如不是金融風暴中中央政府給予香港擊退大鱷的權利,香港市民還不知道高度自治外,還有動用多年來的血汗擊退炒家然後給自己賺錢的自救權利。

  7. 假如不是董伯伯當過特首,民建聯民主黨在立法會說屁話,我們香港市民還不知道香港的精英都跑到外國當二等公民,或者高官的兒女都在外地安居樂業。看!外地的月亮多麼圓!

  8. 假如不是沙士來了,香港市民還體驗不到新聞自由資訊發達的好處,而且香港的醫學研究是站在國際前列。

  9. 假如不是CEPA,自由行都在實施當中,我們香港也看不到香港的經濟已回歸祖國。祖國的同胞教會我們如何將自己演繹為性格巨星,富起來的大款該是甚麼口氣,作為該帶多少東西到澳門的賭場,談話的嗓子應該多大。

  10. 假如不是怒火同胞告訴我們香港市民,我們也不知道我們完蛋了!
我們香港所有市民都錯了,一直以來也錯怪了中央政府了,小詩冀望日後同胞能夠多多指正香港市民的思想錯誤。小詩建議各位香港市民寫檢討之前,必需反覆研究領導的鼓勵金句同胞的嚴正訓示,為日後執行指導思想做好準備。

在此小詩提供訓示來源給各位參考:


星期三, 8月 06, 2008

小詩隨筆99

迷死人

令小詩迷上的東西都是逝者的遺作。音樂喜歡Carpenters(Karen在小詩面世之前已經仙遊)、陳百強;現在讀的書是柏楊的著名遺作《醜陋的中國人》。

故人的遺物內容可供後人自行演繹(無恥者更可大作詮譯,自據一家),那種供人幻想的空間之大,雖非故人生前所願。但青出於藍的良性精神互動,重新包裝或以另類形式表達遺物,不論於文化經濟社會層面仍有大利可圖,君不見貓王John Lennon一直以來高據死人發財榜之前二名?

買復刻版CD/DVD、每年在演唱會追思會哭哭啼啼幾場只是香港「粉絲」的獨有標記。發死人財的高手,在香港還是少見。

----------------------------------------------------------------------------

臉書遺思

為了看朋友的相片,結果一慕Facebook大名當了個會員。到現時為止共玩了兩個星期,感覺上還不如傳媒所言般威力強大,假如李超人真的想收購臉書的話,大概會落得「貪得金」類同的下場。

對一眾可供自行加入的附加功能,小詩還真摸不著頭腦,可能小詩還是個喜歡動腦筋思考的傢伙。這些一按即辦奇奇怪怪的程式,小詩實在接受不了。反而最欣賞的是非實時的聊天功能,對比起MSN等IM功能,臉書的聊天功能沒有寄失訊息的煩惱,單對單的漫長閒聊絕對會是工作/生活繁忙的朋友之間聯絡感情的方法。

------------------------------------------------------------------------

不知所謂

「 My Little Airport的成員阿p寫下了新專輯的主打歌「浪漫九龍塘」,歌中反映了香港戀人與九龍塘一帶時鐘酒店的故事;一峰創作的「畢業變成失業」則是時下年輕大學生的就業問題。」Yesasia.com

《浪漫九龍塘》個解釋都叫勉強講得通
咁《畢業變成失業》係阿P寫o既定係Chet lam寫o既呢?
究竟係大學生心態頹定係向當奴作血淚控訴?
隻碟係咩來頭都未睇清就可以寫intro
真係笑死街坊...

----------------------------------------------------------------------------------

不願想起,未敢忘記


讓這首歌記住這複雜迷亂,煩惱失常的日子
剩下的通話分鐘,我的思緒
我與你之間的對話
還有天意弄人的差距

星期日, 8月 03, 2008

再度回味7


高皓正又有新作!真係以為睇緊旺旺廣告!
係咁食生果...因住食到屙呀爛gag王!


癡線低低B強勁舞步演繹爛gag王作品《搭錯車》
頂!今鋪真係笑到個肚Yamate...


最近根據影評睇左套陳年「鉅作」
Casting星光熠熠陣容強勁...嘩嘩聲!
仲勁過MAXIM講陸家俊果張《心對心》o既production team
連埋王晶爛到X街o既劇本
夾埋真係曠古爍今可一不可再!

星期六, 8月 02, 2008

Blog聞異想

筆跡

小詩絕對認同一個人流露的文字風格,是一種個人性情的表現。雖然每一個字是冰冷的,但拼湊起來配合人類從後天學習回來的語感,那讀者所能看到的就不是毫無感情的表達了。

小詩喜歡看專欄,是因為能與作者在一瞬間共同分享喜怒哀樂(而且覺得看書很費神,更新資訊速度慢),更能從字裡行間看出作者與人交流時的態度。譬如看梁文道的文章,輕鬆平實的文字裡對時弊扎上一把把的針,用一種不是說教的口吻去進行批評。回到看他上電視時的訪問,對著主持人或者記者都是用一種閒話家常的語氣回應,不像劉銳紹般裝專業硬要提起精神樣子說話抑揚頓錯。

所以看了這麼多博客文章以後,小詩總是覺得以下博客真人會是如此...

渣老闆會是一個內向,但內心充滿鬼主意卻不敢表達的男人。

大鐵鎚會是一個愛鬧事,面對日常事情裝作愛理不理,但實情很在意的工程師。

CK老闆會是個很愛說話,對自己很多疑問,對日常小事過分擔憂的老闆

寫到這兒.....小詩覺得自己其實只是純粹亂猜一通............

--------------------------------------------------------------------------------

現身

據聞空姐的真面目被人惡意偷拍。接到這消息時,小詩連丁點兒追看的意欲也沒有,雖然對一眾博客的真實面貌非常好奇,但老實說小詩反而對與他們面對面真人交流更有興趣,大概可以從另一個角度聽聽他們分享有趣的生活。

小詩一如大部分博客都沒有把真面目現於讀者面前。原因很簡單,也就是分享生活思想見聞之餘,同時保存自己的私人空間。不過對於喜歡八卦的讀者來說,能夠一睹真人實在求之不得,但看見現實過後與心中印象相差萬千丈遠。博客的秀麗文筆將生活描繪得耐人尋味,但眼見真人五官融為一體生活平淡如水,讀者絕對會懷疑博客們是否患有精神分裂症。

或許明白了博客的文字只是建立給讀者的印象這條道理,讀者才會明白文章當中有真有假,能夠看得開心引起共鳴已經是萬幸。

小詩在豬展當工作人員其間,看過不少明星名人記者在自己身旁吃喝談笑。從他們的表情告訴小詩,他們和一般市民大眾沒有甚麼分別,都是盡情生活盡情工作盡情與朋友失態地嬉笑。請問零售界的朋友,你們在下班後逛街會否經常性擠出燦爛笑容?請問金融界的朋友,你們會報喜不報憂嗎?請問製造業的朋友和辦公室的上班族,你們會逛酒吧在辦公時間躲懶遲到不知所蹤嗎?也請問各位,你們喜歡被跟蹤嗎?

毫無表情的擦身而過或者報以一個不求回報的微笑,肯定比竊窮私語道人長短來得高雅。

星期二, 7月 29, 2008

小詩隨筆98

開心與不開心之間

開心是因為碰上一群泰國遊客,他們真的很友善
不開心是因為被客人無理取鬧,只能默默受氣
開心因和同事之間氣氛輕鬆
不開心是因為上司怪異還有因此遲放工
開心是因為碰上朋友
不開心是因為不能跟他們一起走
開心是因為買了點東西
不開心是因為.....

----------------------------------------------------------------------------------

第一次的新鮮感

我明白為何要對生活保持第一次的新鮮感
它會讓我小心翼翼去辦事
它會讓我專注做事
它會讓我努力學習
它會讓我努力思考
它會讓我勇於嘗試,發問

保持這種感覺,絕對能讓我向著我的目標邁進

----------------------------------------------------------------------------------

Image Behind The Mirror

晨早坐地鐵,總會讓小詩發現有趣而微小的事情
這天讓我看見一對上班族情侶
雖然他們背向小詩
但我仍能從車門反射出來的影像
看見他們溫馨的場面
假如可以的話
我絕對希望把那一剎的畫面用相機留住


星期六, 7月 26, 2008

小詩隨筆97

也談豬展

小詩今年撈豬展
每日都有幾萬人係小詩身邊經過
同超過二百個唔識o既人交談
假如小詩有女朋友
會第一時間再加多句
「每日都見唔少低胸性感女士同學生妹埋黎挑逗小詩」
等佢呷醋下

有唔少男士係度問小詩
一眾女偽人o既賣肉全集係邊度有得賣
問到小詩幾乎發開口夢都識答
你班死野唔該記住
hotcha就同趙碩之一齊係hall 2星島個度
Theresa就係Hall 1
AngelaBaby就斷左貨,你地去七仔買啦

至於各位豬迷
想買渣老闆或者一眾blogger o既新豬可以去Hall 2
張小嫻D毒豬係Hall 1
馬仔新出漫畫係 Hall 1中間部分
三色台o既產品同TVnasty個公仔係Grand Hall
查大俠o既小說係Hall 2明河出版社

小詩係負責趕牛o既一群
趕牛途中見到幾個十二三歲o既細路
拎住本hotcha o既賣肉全集
小詩同個同事就借機整蠱佢地

小詩:「細路識貨喎!百三蚊讓俾我得唔得?」

細路甲(好驚):「唔得!」


小詩:「咁借黎睇下得唔得先?」

細路甲(一臉疑惑):「你自己去買啦!」


小詩:「o靚仔曲線得你丫!你都幾識打個round幫你偶像宣傳喎!」


個細路當堂面都紅晒.....
怕醜仔真係特別好玩
不過最好笑都係呢單
有位學生妹問我同事一D野

學生妹:「有邊個出口係出左去就入唔返黎o既呢?」

同事J:「其實所有出口出左去都係入唔返黎o既」

情況類同問人地阿媽係咪女人一樣...
真係頂癮!

做完野係個場蒲
本來無行過豬展又平時睇雜誌多過睇豬o既小詩
都忍唔到手買左D豬睇
至於買左D咩就唔好講俾大家知
費事話我hardsell啦....

行完成個場反思下
真係覺得豬展有D似廟街地攤散貨場
同埋香港o既讀豬人係咪真係咁多呢?
(小詩覺得買賣肉全集o既朋友多D..)

----------------------------------------------------------------------------

壞人之黑暗騎士


放左工仲暴走去同Yesike,兩位大小姐去睇badman
嘩...幾驚會訓著呀大佬....
講D野咁鬼深...英雄主義+物極必反+社會灰色地帶....
當班影評人係度吹緊英雄主義
同大家係度講耶穌o既時候
小詩就係度研究緊果四個麻甩佬o既character

Joker係個有不幸遭遇o既聰明人
天生需要別人o既目光同成就感
係白界撈唔起咪玩黑道囉
但係點可以搞到咁多人忽然跟佢搵食
呢點真係捻唔明.....

Bruce係個天真低能無知o既有錢仔
一句講晒不知所謂....

Dent係一般正義上腦o既傻仔
唔怕死,但至怕唔生唔死
因為一時錯折而心靈受創
佢心理質素差同自視過高
好人都變左做壞人

Gordon係個睇化世情o既老差骨
搵到兩餐之餘又打擊到罪案係佢o既目標
咁多個麻甩佬最識顧全大局果個就係佢
十足《英雄》o既殘劍....

人地話Heath Ledger D戲好搶
但係小詩就覺得Morgan Freeman D戲先係最正
佢演繹果份自然同自信非常懾人
小詩認為今次Heath演o既Joker比卡通裡面o既相同角色有深度好多
所以大家先覺得佢正o既o者

-------------------------------------------------------------------------------------

閱讀推介

本來小詩想寫篇野講下傳媒報道失當
仲已經寫左一段仔野
點知睇完文化梁o既文章
就知自己可以收皮慳D疊埋心水寫過第二樣野
各位鍾意睇娛版同三份銷量最高報章o既朋友
不妨睇睇,絕對有益身心!

URL: http://blog.sina.com.cn/s/blog_4c37827601009yfy.html

星期三, 7月 23, 2008

純粹創作-清晨中的黃昏

(Picture Source From: URL: http://www.leonardcohenfiles.com/hand.jpg )

黑暗中,早班火車駛出隧道,緩緩的停泊於月台邊。

人生七十古來稀,這刻我又能夠稀罕些甚麼?費盡力勁踏上黑色車廂,來到屬於我的座位。

終於可以趟下來了,喘氣的聲音伴隨著車輪與路軌之間的撞擊聲。我發覺我已不夠力氣再吸取任何空氣,只能數一下身邊經過的樹木,窒息的感覺慢慢降臨。

無力的一雙手撥開了一小段窗簾,迎來窗外的陽光。我幻想吸著窗外的新鮮空氣,但陽光殺死了我,我真的情願是陽光殺死了我....

星期六, 7月 19, 2008

純粹創作-深潛

又到暑假,暑期活動總是排山倒海而來。人家的兒子能夠歡歡樂樂過一個無憂假期,而我卻跟每天見面時間不超過十五分鐘的胖爸爸一樣,忙得體力透支。今年不出我所料,媽媽又給我報了英文補習班、圍棋班和游泳班。每年這「三寶」肯定是必備課程。假若今年不是升五年級,媽媽肯定會多給我甚麼唐詩班數學班電腦程式班。

此時此刻,我圓渾的軀殼在水中飄浮,聽著泳池內唯一的墨鏡彪型大漢指揮,如何將雙腿分開,再調教四十五度角向下一伸。

課堂終於完結,我被站在訓練池邊的媽媽拖到另一個泳池加操。我對媽媽撒嬌說我很累,她就讓我依傍著池邊休息一下。難得能夠避開媽媽的視線和聲線,我立刻把頭栽到水中感受一下水底下寧靜的氣氛,靜下來思考一下。穿插經過身穿三點式的姐姐,姐姐們一對奶子雖然大,但論到可愛動人還不及芭蕾舞班那位孖辮妹妹,她與我含笑對望的一刻我仍然記憶猶新。

還未能夠在天堂裡一親孖辮妹妹香澤,媽媽已喚著我的名字,要把我的軀殼帶往英文班了。

人在江湖身不由己,參加一大堆活動都不是我的意思。在媽媽的日夜壓迫下,我越來越覺得陳叔叔安慰胖爸的一句「生活就像強姦」是多麼的切合我的生命。


星期五, 7月 18, 2008

再度回味6-低清製作


睇見就想笑....
That's Fxxking Fun Man!


《鐵將軍》個廣告真好得!
笑到趴街!


TVeasy就係有兩個極端
一係好gag一係好爛

星期四, 7月 17, 2008

不學無術系列-有神論與無神論之間的爭論是無意義嗎?

在宗教信仰的立場上,小詩現在是一名傾向無神論不可知論者。

在談及有神論無神論之前,我們應搞清楚甚麼是「神」。「神」在公眾裡的共同認知來源、宗教經典內「神」的特質及「神」的出處。先搞清以上三者,有助我們去釐清每一個宗教表達的「神」之真偽。

在進一步探討問題之前我希望各位先了解一個有神論者通常攻擊無神論者的立場。

「無神論者去討論神的特質是沒有意義的」

意思即是假如你不相信有神存在,再去討論神的特質也是空談。(有甚者更以自打嘴巴作形容)若果筆者將「無神論者」改成「不相信有龍存在的人」,而「神」改成「龍」:

「不相信有龍存在的人去討論龍的特質是沒有意義的」

社會上普遍相信「龍」不曾存在,但每逢節慶舞獅舞龍,於博物品欣賞古代藝術品,我們皆會對其中的「龍」評頭品足,甚至辨出「龍」與麒麟(一種與其「龍」的外形近似的但相信不曾出現的物種)之間的分別。事實上「龍」是否存在對我們討論「龍」的特質並無大礙,因為「龍」的形象是從各種學習媒介進入我們的認知層面,大眾對龍的形象亦有一定共識,我們所討論的「龍」只是屬於認知層面與各媒體描繪之間的細節及分別,是否合乎大眾期望等等。

回到神的問題,無神論者只是根據大眾共識及宗教典藉中神的特質,去推敲比較有神論者所相信的神,牠的言行舉止思路是否合乎邏輯,從而推斷「神」的存在及其特質的的可信性。邏輯在生活的功效是推論一個高可靠性的結論,對於任何人使用邏輯去解決問題,其結論也不太可能沒有意義吧!

17/7補:「無神論者去討論神的特質是沒有意義的」這句子本身已犯下人身攻擊(Ad Hominem)的謬誤

上帝已死?諸神已死?

尼采之所以能夠宣佈「上帝已死」,事實上和李天命攻擊「全能上帝論」一樣,全因聖經上描繪的「神」犯上邏輯謬誤,所以「祂」存在的可能性存疑。當然「上帝已死」這說法只針對基督教(e.g. 天主教,新教),並不代表這個世界沒有「神」存在的可能,基督徒及不少無神論者經常會墮入False Dilemma這個謬誤當中,而引發多重無謂爭拗。

大學頒授的哲學博士(Ph.D)能套上「哲學」二字銜頭,皆因造學問必需經過邏輯思考,細心分析研究材料,才能發表研究報告向同行分享討論。一份好的研究報告內容取材必需有根有據,立論亦要條理清晰合乎邏輯;並非如三流教會牧師隨便拿出一條聖經經文,便自吹自擂自行演繹。在此時此刻「神」這謎團仍然未能解開,亦相信是漫漫長路。但以嚴謹的態度分析,以邏輯去演繹結果,不論終能得到答案予否,或者解開謎團的人擁有甚麼立場,其中過程仍然是有意義的。

星期一, 7月 14, 2008

小詩隨筆96

工作壓力

當你發夢都見到你自己做緊野o既時候
你就知你有幾大o既壓力.....

妖....覺得D老細真係計錯晒數
明明要五個人o既日子得四個人
要四個人果個得五個
不過都唔怪得我老細
我老細唔知....不過佢地老細知嘛
早D講聲咪唔使死人囉!

好o勒...而家死頂爛頂到完場
開行turbo 120%個個做到人都癲
大老細你見班人原來有咁好潛力
以後就一定仆街o勒
仲話打卡果陣要打到有break
如果大老細佢大駕出巡
我捻佢想捉一件出黎訓話都無可能

望見黎緊可能每次都係咁o既情況
你叫我點樣唔發惡夢?



搞到咁仆街完全係因為有免費狗展
既然係免費
班狗主仲唔食盡你就有鬼

班狗主唔少都係奄尖聲悶
正所謂物似主人形
佢地拖住果四隻腳都好鬼煩
係我身邊轉來轉去
我又唔敢撞佢(打狗都要睇主人)
好彩班狗唔係lum我
如果唔係我個pat pat會好濕囉!

班姐姐仔就同堆狗玩得好開心...
又影相又放下狗
小詩捻起都打冷震....
除非另一半話要養.....
否則寵物呢家野都係免問好D!

送給朋友




祝我地日後齊齊飛黃騰達!

星期三, 7月 09, 2008

純粹創作-如煙往事


一根接一根,我已經連續抽了十多根煙,我明白今天我為甚麼抽得特別狠。

平日很少看書,但記不起哪位作家說他很喜歡抽煙。一邊沉思,一邊一口一口的把煙吐出來,煩惱就會隨著那縷縷輕煙一同遠去。

不過人已經遠去了...

看著電視屏幕正想得出神,誰不知香煙一點一點的已燒到指縫。

瞬間將手上的燃燒殆盡的煙蒂彈向煙灰缸,我走往陽台開動奶奶留下的陳年留聲機,最後把煙盒內最後一根煙抽完。

這是我最後的一根煙,我終於可以和那些煙道別了。


小詩隨筆95

多朋友o者....唔算人面廣卦.....


食家

自從無記搵左菜瀾做左套「菜瀾嘆名蔡」之係
小詩就無再睇亞記May姐D飲食節目

菜生係節目入面拖住兩個由無記捧出來美女廚神
兩個都算係識飲識食知情識趣之輩
唔似得亞記無神神搵個寸寸貢姓伍o既MK飛
又或者怕怕醜醜o既熾哥出黎搞寸個party

今次無記做得最好就係唔係一個介紹食物o既節目
係好似上飲食文化精讀班咁
一個老師帶住兩個徒弟係度指指點點
點煮先好食?以前D人點食?點解要咁食?點解D菜式會失傳?菜式隨時代點改變?
亞記淨係識得影完碟野o既close up
然後影May姐o既面部脂肪如何行貨表達「滋味」一詞

May姐成日都係果句:「啖湯好清甜....」/「好爽口/香脆」
或者再懶cute咁講句「好~好~味~呀~!」
唉~當小詩食緊舊咖哩薯仔果陣May姐你同我講緊好清甜爽口....
小詩真係唔知俾咩反應你好
其實可唔可以還番D味覺俾觀眾自己去了解下?

有D人話菜瀾死淨把口,唔識煮野學人做食家
講真有邊個廚師會好似蔡生個肚裡面咁多學問?
仲有佢個image係一個critic
唔通寫影評o既一定要做過導演?

透露

人多口雜,把口又唔收
要開開心心咁講野
都係唔好多過四個人

下雨

因為El Nino今年返來o既關係
香城幾乎日日落雨
小詩真係捻緊政府免費開放泳池又有乜用?
落雨都無人去啦.....
黎緊仲話搞奧馬比賽
小詩覺得實落狗屎俾個天搞寸你個party....
除非搵PLA射番兩炮
否則都幾難唔濕身囉!


詞賤聲似...無得彈!

星期五, 7月 04, 2008

小詩隨筆94

有創意


呢位小朋友利用左佢人生一次上電視o既機會
幽左董伯伯一默
小小年紀就知道咩叫「八萬五」
童言無忌......呢D真係高級趣味
講講下我都有D掛住好心做壞事o既董伯


其實黃子華講咁大堆野
都唔夠果位小朋友一個答案咁厲害

----------------------------------------------------------------------------

忙裡偷吃
老細(好靚女果位)好好人
俾左小詩食人生裡面第一件tiramisu
食落口覺得係成口cream....味道係唔錯...
不過同小詩預期有分別
點解「意大利芝士蛋糕」無芝士味o既???
(不過食完差D坐爛個垃圾筒....)

祝同事Yuki前程錦繡
成功晉身天子門生
享受內三院生活!

-----------------------------------------------------------------------------

呀.......痛仲慘過大病!

我今日行完刑黎....
(Picture Source From: URL: http://blog.roodo.com/wonderroad/36bdec29.jpg )

洗牙完來係件咁痛苦o既事
果D挑牙石鑽牙漬真係小兒科到不得了
最頂唔順都係上牙漆果關
好彩有塊唔知乜tissue遮住塊面
D漆彈係我個口腔到痛到飛起
好似成萬幾枝針隊連發隊入小詩個口
死頂爛頂頂到完場
感覺好似坐緊傳說中o既電椅...
洗完棚牙姑娘第一個問題就係「係咪覺得D野好鹹?」
小詩心捻....鹹都好過痛丫...

星期四, 7月 03, 2008

純粹創作-片段

我的人生有如一卷已磁化的錄影帶
放出來的影像是斷斷續續
散亂不堪


在悠揚的琴聲下,我在調校巧克力奶....
在走音失場,表演者失手時
我在製造泡泡

在高速的車廂裡,我一如坐在過山車時緊緊抓住扶手
生怕會被拋出車廂,只因當時太緊張

我給你發了一個短訊,正等待你的回覆

給我向上的機會
也給我機會侮辱自己

某日14時19分,看見熟悉的面孔
某日14時20分,有人弄眼色
某日14時37分,過去的人出現了
某日14時42分,我離開了
某日15時00分,我真的離開了
某日15時05分,我抽了口二手煙
這四十六分鐘,我真的經歷太多了....

費煞思量
如何能夠將拉遠的距離拉近
如何用幾分鐘去表達一件大事情


星期一, 6月 30, 2008

Living with coffee

仙丹咩!飲到你死就得!
(Picture Source From: URL: http://scienceblogs.com/retrospectacle/upload/2007/08/coffee%20poster.bmp )

相比起果班唔知頭唔知路就入去o既beginners
我o既人工好明顯高佢地一截
但係咁唔好彩我唔似得佢可以打份長期兼職
可能過左七月就無得撈

份工基本上除左體力勞動之外
精神壓力都唔少
本住打死罷就o既精神
又不妨姑且一試....
學下野見識下呢個field裡面係D咩人
物以類聚人以群分又幾suit我所見所聞

吸煙

「你食唔食煙架?」
「你唔食煙架....咁乖o既?」
對於呢班做catering o既人
smoking o既意義同地盤工人一樣
都係蛇王o既好方法
但對於一班讀science
鍾意風花雪月o既學生哥來講
smoking不但有失身分(that means你讀屎片)
而且平時已經掂唔少致命物品
真係嫌命長咩?仲食....

粗口

所謂「江湖氣味」根本無可能係我身上搵到
我捻呢樣會係我同果班staff行為上o既分別
大專學生講粗口點都加番兩句雞腸
而佢地係好直接用純正母語
連珠發炮咁爆粗......
好彩佢地無X過我
如果唔係我餐「海鮮餐」都會幾豐富....

搞gag

基本上個工作地點唔會點特別繁忙
所以如果唔搞下gag肯定過唔到日辰

班上司都幾好笑(日日都唔同老細)
又有位成日整古做怪o既老細

我最欣賞佢地搞有味笑話都係明刀明槍
雖然唔係咁好
而且又唔係樂而不淫
但總好過係nasty囉....

是非

有人o既地方就有是非
不幸地involved左落去其中一個漩渦度
好人醜人都做齊
家陣連壞人都做埋

人心難測況且自己又唔係咩高手
我捻而家都係適時抽身
最好以後唔好再搞到我
是是非非真係令人心煩

學習

「聽君一席話,勝讀萬年書」
書係讀唔晒o既
聽下人地D對話
吸收知識速度肯定會快好多

連日黎一路聽D地產界從業員係度講東講西
經濟民生人性服務包裝
如果虛心發問
肯定撈到唔少寶


星期四, 6月 26, 2008

小詩隨筆93

塵埃落定

希望與失望

小詩都唔知應該開心定唔開心好
講得無錯
過左二十歲我就開始面對我o既人生
當日o既預言亦應驗左

今日同博士都傾左唔少計
臨走佢仲拍一拍我膊頭
我心情即刻沉重晒
唔應該死o既都死左一半

返屋企收到封信
話恭喜我畢業
事到如此又何必多此一舉...

包裹(妹仔大過主人婆)

餅家廣告:「香港終於有手信」
小詩:「我幾難先捻到買佢地黎做手信...」

呢篇《小詩隨筆》係特別獻俾某D話我疏於寫作o既人
老實講句,我近排無咩心情寫小品....

星期一, 6月 16, 2008

不學無術系列-糧荒與基因改造

近幾個月通貨膨脹得非常厲害,到超級市場買一斤豬瘦肉也近三十塊錢,米價上漲近三十個巴仙,連一包普通不過的老牌上湯即食伊麵也賣上二塊半以上的價錢。有心人自然能從這些數字看到原因,除了油價猛飆之外,世界各大炒家努力在原材料市場炒賣期貨也是主因。其實糧食根本不缺,只是分配不均,而且農民囤積居奇,炒家將不利消息努力炒作,所以價格才得以暴升。

高價格令人道救援組織苦不堪言,限米煮限飯以下組織所能購買的糧食也大幅減少。我們暫且放下某些救援組織中飽私囊的醜聞,難民及飢荒地區的人民確實處於水深火熱之中,假如物價上漲仍然持續,等於間接殺死大量人類生命。此時此際有人重提擱置多年的基因改造食物,以救活千萬生命。

基因改造農作物及食品的設計原意是增加產量及豐富人類營養,但自推出以來一直被環境保育組織(尤以綠色和平為甚)大力打擊。環保組織以電影內嘩眾取寵的橋段(如吃了會變人獸混合體,皮膚會變成五顏六色)向大眾渲染基因改造食物的壞處,而多年來能夠真正觸動到問題核心只有基因污染及一個尚未有結論的疑團:基因食品會中和抗生素效力。

假如閣下對生活甚至科學有用心了解,也會明白我們每日吃的朱古力、豆類製品、咖啡及玉米片等都有基因改造成份。我們當然沒有因此變成科學怪人,身體其他地方也沒有任何不妥,但不知不覺間這些改造過的基因改造物種卻在大自然間向其同類及親戚散播經改造過的基因。驟眼看來問題看似不大,大自然世界卻因此來個天翻地覆,在達爾文《進化論》提及到的「適者生存」下,形勢比人強的基因改造物種將會「統領」動植物界,亦可能將其他物種滅絕。

雖然不知不覺大自然充斥不少基因改造物種,但至今基因改造產品仍未能於世界上產生巨大經濟效益,原因在於生物科技公司選擇了與藥廠類同的生存方式。生科公司每研發一個新品種,也會將不育基因置於其DNA內,務求農民每季收成後都必需乖乖繼續向生科公司奉上金錢購買種子。這變相由生科公司操控市場,可幸的是暫時被此類情況並不常見。不過不常見並不等如無需提防,基因改造農作物極有可能成為全球一體化下,富可敵國的財閥壟斷全世界市場及操縱政治的工具。

因基因改造食品不能撲滅糧荒的熊熊之火,因此各國專家均絞盡腦汁尋找新的食品來源。最近有聯合國糧農組織科學家提出養殖食用蟲類解決全球肉類短缺問題,世界輿論均形容吃蟲實在不可思議,有如蠻荒部族行為一樣噁心和不文明。從日常營養在看待含豐富蛋白質的蟲蟲,吃蟲未嘗不是解決方法。不過已發展國家的人民已習慣享受肉類脂肪及其纖維的樂趣,儘管他們過度飲食,因為吸收過量脂肪而得心血管病,因為吸收過量蛋白質而得到腫痛得死去活來的痛風,但要扭轉來自這群食肉族群的巨大的肉食需求,實在微乎其微。可憐營養不良的發展中國家人民,只能眼巴巴看著自己一手養的牲口,送往西方國家的超級市場。

救人自救,助人自助,在這些糧荒危機下的日子,各位享受美食之時請謹記均衡飲食,減少多餘的食物浪費和金錢消耗,為拯救自己的健康和別人的生命出一分力!

小詩隨筆92-一千個話

人都係同一種
但真係勁好禮貌!而且某D姐姐仔都幾後生!

1000th

小詩係網上面寫野已經寫左1000篇野
但望真D左手面
點解你會數到九百幾o既呢?
係囉!點解呢?

名字

行走江湖點都有返個朵....
小詩有真名有網名有「字」仲有工作化名
去到邊都有唔同身分
完全人格分裂...

頭先某間Agent打電話黎
「點呀?而家識唔識沖Exprexxo/Xappuxxino?」
你當我神仙咩?三日咋!
下次問下佢肯唔肯教先算啦!

世上的另一個「我」

一直以來我也以為我生來就是獨一無二
名字獨一無二....
這個世上只會有我背負著這個名堂
甚至是原罪
直至這個月我在這世上發現了你們
住在三水的你
住在安徵拿了農業獎項的你
已榮升父親為一位小女孩父親的你
當研究員的你....

而我是個拿了一張無名分數紙的小伙子....

我不知道我們未來的路會怎樣
但願我們能夠努力打拚
當有一天有人呼喚我們的名字
或者搜尋我們的過去時
會有讓我們自豪或者叨光的地方...

星期三, 6月 11, 2008

Deteriorated Crew & Hell Limited (for God Damn Fucking Guys from DCHL)

好討厭...亦好令人無奈

好仆街一號...
好仆街一號與其仆街妻子

有錢,識走法律罅當然可繼續惺惺作態

----------------------------------------------------------------------

墮網,逃離

2005年10月30日

小詩收到一名中學師兄電話
說有「著數野」介紹給我
師兄約定小詩於理工大學門前等候
當時小詩正值準備大學聯招選科
以為師兄約定其他前輩向小詩介紹學科細節
小詩不虞有詐因此前往........

2005年10月30日

小詩準時到達
師兄來電叫小詩乘過海巴士到銅鑼灣
甫見師兄,一身整齊西裝活像個上班族
進入世貿分舵
赫見自稱月入十萬但衣袖骯髒手戴數百元平價鋼表之輩
經過六個小時圍攻
終能絲毫無損全身而退
同時自此少了三個點頭之交

--------------------------------------------------------------------------

烈士記

URL1 : http://tkma.blogspot.com/2008/05/blog-post_23.html

URL2 : http://tkma.blogspot.com/2008/05/blog-post_26.html

URL3 : http://tkma.blogspot.com/2008/05/faq.html

衷心感謝此位烈士博客黑人以身犯險!小詩向其英勇行為致敬!

-------------------------------------------------------------------------------------

產品的科學根據及邏輯分析

1.)釋出臭氧消毒殺菌,另加淨化空氣特異功能

臭氧消毒在普通人眼中是一項非常先進的消毒方法
配備臭氧的小型消毒設備動輒以十萬計
以五千元便能「體驗臭氧功效」
實在非常超值同時亦非常兒戲

對於其產品是否含有臭氧
因未能掌握其產品數據我們姑且不談
但從眾多科學學生撰寫實驗報告時定必抄考之兩本聖典
Answer.comWikipedia上所得資料
臭氧乃一種有毒物質
而且為溫室氣體之一

一般能夠滅殺一切害菌之物品
同時亦有置眾人於死地的偉大能力
臭氧亦不能例外
臭氧殺滅病菌之功效在於其強勁氧化物質能力
其不穩定氧分子於氧化物質後會釋放氧氣
但距純氧之比例仍然差天共地
人類吸入臭氧會造成肺部細胞灼傷受損
若長期吸入會引致肺功能減弱
大劑量吸入者日後亦能體驗呼吸困難或窒息等被虐者樂趣

至於將二手煙消滅之論亦為邪魔異說
其實驗中實為高濃度煙霧中懸浮粒子
因依附香薰油分子而產生沉澱現象
試問閣下家中可有如此濃煙密佈?
再者若真有其效
吸煙者亦會被滿地塵屑大嚇一跳
立刻乖乖戒煙或往曠野之地吸食合法毒物

2.)醫治鼻敏感

根據香港醫聯網相關條目
鼻敏感者應避免接觸致敏源
諸如香薰油內的「草本精華」乃致敏源之一
雖有中醫「以毒攻毒」等特殊方法
但中醫治理鼻敏感以強肺為先(參見此)
所以香薰油能醫鼻敏感之說亦未免太過不合中西醫學邏輯

3.)獲得國內大學及法國化驗所認証產品有效

國內不知名大專院校內野雞研究院數目有如天上繁星
近年由於缺乏資源大肆擴張勢力範圍下
因此斂財手法非常可佈亦層出不窮
(下刪二百字,內容請閣下自行想像)

至於法國化驗所報告內皆法蘭西語文
小詩實在無法確定內容及化驗所名稱
不過其報告其中一幅Scatterplot圖表
連XY軸的註釋及比例也欠奉
可見其製作馬虎,而且可信性存疑

-------------------------------------------------------------------------

後話

愈深入研究便愈發覺該公司旗下推銷手法謊話連篇
不論投資自用皆為下下策
與其相信一群衣冠禽獸自圓其謊
不如將五千大洋投放於六合彩一年更為化算
祝諸位能夠避開破財之虞!

星期五, 6月 06, 2008

小詩隨筆91

今年的鳳凰木花朵開得非常茂盛
阿冤解說是因為早回冷了一大回
所以開得特別好了....
說起來也幾年沒看過鳳凰花開了.......

等待...忍耐

下個月會拆晒D block
兩年來對條利o既煎熬又可以告一段落
換上一副「假牙」(固定器)
而家頂住晒條利搞到口齒不清....
D要用條利發o既音完全唔清唔楚
自己都聽到扯晒火!

為左預防「語癌」
唔使講野先戴副假牙
應該捱多陣就掂...
萬大事都要忍耐下

----------------------------------------------------------------------------

To me, the Fact is Unbelievable!



----------------------------------------------------------------------------

That's Why I have Picked This Song...


星期四, 6月 05, 2008

小詩隨筆90

五年黎都爆唔到
今次終於都爆到啦...
(Picture Source from: http://z.about.com/d/internetgames/1/0/K/6/ccgen01.jpg )

多試一次

《C&C Generals》係隻幾難玩o既Game
對於我呢D唔係咁熟RTS o既人來講
真係難上加難
以前一定會儲夠錢造勁多武器
務求以質同量壓倒對手
可能係因為咁啦
一直都爆唔到China Force o既7th mission
今次小心翼翼試過幾次
再度橋用超級武器打D base
打晒D dealer先鬆一口氣
睇完個普普通通o既結局
五年來o既心結解開左

有陣時放低左o既野
過左一排會有新o既進展
有時覺得今世無可能做到o既野
其實唔係你無本事做
可能係你未捻到點去做o既o者..............

-----------------------------------------------------------------------------

臨近一千

唔知邊篇先係第一千篇....
但總之好近....

D幾千字o既文通常寫到一半就會停晒手
我好想今個暑期寫好晒佢
對自有個交代
亦希望俾D驚喜大家
(尤其係某堆特別對象)

我希望唔打機唔睇書都要寫好佢....
多謝!

------------------------------------------------------------


What I will be tomorrow?

星期六, 5月 31, 2008

今期播放25-潮流興懷舊

近幾年都有D去左大陸搵人仔之後(因為係香港撈唔掂)
「強勢回歸」香港o既歌手
早兩年有「金牌一哥」
上年有而家潛水讀緊書搞埋「分手公司o既老孫
而家有差D唔記得佢存在過o既東東



佢首新歌...聽落甩頭甩骨....
個melody好似死唔斷尾咁....真係好X難聽...


「阿東」陳年佳作之一
節奏明快...順耳好多...
聽到電台訪問DJ叫做「阿東」
真係有D怪...但聽到佢老哥講追女其間果句
「開左file仲有得停o既?」
小詩就覺得佢真係夠麻甩o勒


熟讀娛版o既朋友應該知道
呢首歌係講佢前期演藝生涯裡面其中一件重要事件
講起佢前期演藝生涯就不得不提四哥個仔
當年四哥個仔同佢同期出道爭上位
雙方D粉絲幾乎全武行,甚至幫對方偶像改花名
而家十年後望番轉頭
佢同四哥個仔加埋四哥家嫂三個人各自o既故事
加埋真係「世界真細小小小....小得真奇妙妙妙」


由於佢老兄太過babyface,亦太過靚仔
(呢個係娛圈大忌,當年台灣「小旋風」就係人辦...)
由千禧年霉下霉下到而家
小詩真係唔睇好佢再有機會發圍...
又係唔講唔知,佢係視帝個同門師弟來架


特別加插:同樣叫「阿東」...同樣撈娛圈...
同樣係香港人...同樣搵人仔...連個樣都好似!

翻炒舊貨o既唔只土炮製作
仲有洋貨,不過手法就高明好多


最近電視電台賣到好行
因為佢地o既老翻
小詩都唔係識佢地好多歌...
不過貴為瑞典國寶之一
佢地D歌又係幾無得彈!


隊老翻唱到字正腔圓
同「阿爸」帶D口音完全唔同feel
講真「阿爸」除左值錢在佢地唔撈
仲有一樣就係「集體回憶」


利用米字國o既傳奇樂隊D歌仔搞番齣Musical...
係香港淨係「城市旅人」先有咁o既idea
小詩建議都可以幫Leslie先生同Anita小姐搞返齣類似o既Musical
好過年年搞埋晒D聚會哭哭啼啼咁搞到個心都唔安落!

-----------------------------------------------------------------------

唔係得舊野,都有新野o既!


有人問小詩咩叫「爆房」...
爆房咪即係咁樣囉...你信唔信丫?