星期四, 6月 29, 2006

我二字頭

不經不覺,我已經告別左一字頭幾個月....
講真....
仲覺得自己係十幾歲....
唔單只係講感覺,心態上都係.....
感覺到呢種「年輕」唔係好事
但係又好唔捨得

生活逼人
係呢一年我好感覺到o既事
無錢萬萬不能
覺得自己搵錢能力之弱
唔好講咩養咩住咩....
分分鐘拎綜援o既錢
仲多過你有本事搵o既....

錢,學業,事業,家庭,人際關係
望下望下一下子就發覺好多問題
前途未卜
錢又未有本事搵得足
解決問題o既能力亟需改進
發覺爸爸媽媽真係老左,
身體又開始退化
似乎唯一安慰o既係...
自己o既人際關係都叫OK...

發覺身邊有D朋友仲係得過且過咁樣
唔知係佢地未成熟
定係逃避現實
無論係你定我
咁一世都唔係辦法....
所以我發覺,我同呢類朋友有D距離....
迎合佢地又唔係
唔迎合又好似唔係幾好
雖然大家都可能係「少年輕狂」
但係「遊戲人間」似乎唔適合我地o既年齡

而家D事好多時候都會學習自已解決...
無論大鑊細鑊...
一個人搞得掂就無謂搵人
搞唔掂最多都係搵朋友
屋企人有時真係幫唔到你手
正如爸爸媽媽唔識雞腸
讀D雞腸書唔明,佢反而仲要問番你
有時仲問你意見...點幫你o者?
自已捻掂佢啦....
大學揀科喎....
科學,工程,電腦工商藝術...
當年俾CP搞到連書都無得讀好....鬼識咩?
自己捻掂佢啦....
慢慢...擔子落係自己搏頭上
有乜計?摸石過河囉....

Graddin果日林生話
我地咁o既年紀要玩o既都玩夠
其實我好想講
我未玩,更加未玩夠...
望番一字頭果十年,我玩過D咩我值得玩o既呢?
都唔知自己做過D乜....
除左學校,功課,溫習,重讀果年塞住成棚人渣o既烏鴉口
同捻埋D廢話與真理之間o既「偉論」
我o既一字頭真係無乜成就.....
(一睇我張testimonial就知...)

十年就咁過左去
細細個o既時候覺得人地講七十年代
感覺真係好古老,極有距離
七十年代對我來講同咸豐年間無分別
做左呢廿年人...
而家睇八十年代,真係一D距離都無...
軟硬猶在,一樣咁搞野...
而家仲話講復出
除外D人身上o既衫褲鞋襪眼鏡化妝唔同之外
基本上D人無太大o既分別
所以果D咩「人生如夢,人生匆匆」
我愈來愈相信
十年都好快過

家陣二字頭黎到
好快就三字頭....
朋友話未來呢十年將會好唔得閒
有得玩就玩....
唉....唔知....
係呢一刻,
我只係想我呢個二字頭無遺憾o者~

(P.S.奉勸各位睇緊呢篇野,而且仲係一字頭o既朋友
無論你o既一字頭生涯仲剩番幾日,幾個月,抑或幾年也好...
真係....盡情去玩,玩盡佢....
盡情去學,學晒佢.....
相信....更加希望你o既一字頭會比我o既精采千千萬萬倍!)

沒有留言:

發佈留言